Ónerkásiptik qaýipsizdik baǵytyndaǵy zańdar qaıta qaralady jáne qatańdatylady - depýtat shahtadaǵy apat jaıly
«Bul qaıǵyly oqıǵa barlyǵymyzdyń janymyzǵa batyp otyr. Sonymen qatar, bul biz úshin syn bolyp tur. Osy oraıda, Úkimet aldaǵy ýaqyta osyndaı jaǵdaılardy boldyrmaý úshin jumys atqarýy kerek dep esepteımin. Jabdyqtardyń tozý máselesi bolǵany da jasyryn emes dep oılaımyn. Degenmen meniń pikirimshe, adam qaýipsizdigi birinshi orynda turýy tıis. Tıisinshe, Úkimet pen Parlamenttiń qos palatasy birlesip, zańdy qatańdatý boıynsha sharalardy qolǵa alýy kerek.
Shahtınskidegi jaǵdaıǵa kombınattyń basshylyǵy jaýapty bolatyny anyq. Bul máselege Prezıdent te tikeleı aralasyp, qatań baqylaýǵa aldy», - dep atap ótti Fahrıddın Qarataev.
Onyń sózinshe, depýttattar qaýymy aldaǵy otyrystarda ónerkásiptik qaýipsizdik salasyn retteıtin zań jobalary men quqyqtyq normatıvtik aktilerdi qaıta qarap, jaýapkershilikti kúsheıtýdi qolǵa alady.
«Biz zańdy qatańdatýymyz kerek. Óıtkeni, qazirgi zańnamada jeńildetilgen tustary bolýy múmkin. Solardy qolǵa alý kerek. Óndiristik kásiporyndardy úlken nemese kishi dep bólýdiń qajeti joq. Barlyǵyna birdeı talap qoıý mańyzdy. Ol úshin depýtattar men Úkimet birlesip, aldaǵy otyrystarda zańdardy qaıta qarap shyǵady.
Eger qoıylǵan talaptar men mindetterdi aktsıonerlik qoǵam oryndamaıtyn bolsa, onda zańdy odan ári kúsheıte túsý qajet. Depýtattyq korpýs mundaı túıtkilderdi jaqynda ǵana kóterdi. Burynǵy oqıǵalardy mysal etip aıttyq. Usynystar da aıtyldy. Depýttatyq saýal joldadyq.
Biz bul máselege asa nazar aýdaryp, aldaǵy ýaqyttarda osyndaı jaǵdaılardyń bolmaýyn qamtamasyz etý úshin jumys isteımiz.
Shahtınskidegi apattan qaza tapqandardyń qaıǵysyna ortaqpyz. Ózimniń jáne áriptesterimniń atynan qaıǵyryp kóńil aıtamyn», - dedi depýtat.
