Ónerkásipti damytý qory saqtandyrýshylar pýlynyń baryn moıyndady
Buǵan deıin Básekelestikti qorǵaý jáne damytý agenttigi saqtandyrýshy «Eýrazııa» SK» AQ-nyń «Indýstrııalyq damý qory» AQ-na qatysty ótinishin qaraý nátıjeleri boıynsha qorǵa habarlama jibergen bolatyn.
Agenttik málimetinshe, 2021 jyldyń qańtarynda Qor saqtandyrý kompanııalarynyń pýlyn qurdy, oǵan Qazaqstan Halyq bankiniń enshiles uıymy «Halyq» Saqtandyrý kompanııasy» AQ, «NOMAD Inshýrans» SK» AQ, «Qazaqmys» SK» AQ, «Sinoasia B&R» SK» AQ jáne «Vıktorııa» SK» AQ kirdi.
Ótinishpen jumys isteý aıasynda, qordyń lızıng alýshylarǵa pýlǵa qatysýshy kompanııalarmen lızıng nysanasyn saqtandyrý sharttaryn qosa jasaýdy tabandylyqpen usynǵany anyqtaldy. Qordyń mundaı áreketteri, agenttik atap ótkendeı, saqtandyrý qyzmetteri naryǵyndaǵy básekelestikti shekteıdi, óıtkeni olar pýlǵa qatysýshylarǵa negizsiz artyqshylyqtar beredi.
Alaıda Qor saqtandyrý men qorǵaýdyń sapasyn arttyrý úshin saqtandyrý kompanııalarynyń pýlymen yntymaqtastyq týraly shart 2021 jylǵy naýryzda jasaldy dep málimdeıdi. Qordyń saıtynda jarııalanǵan habarlamada pýldyń quramyna naryqtyń 25%-yn alatyn bes iri saqtandyrý kompanııasy kirgeni atap ótilgen.
«Pýldy qurýdaǵy maqsat – qor klıentterine halyqaralyq qaıta saqtandyrýmen qorǵalǵan tólemderdi júzege asyrý boıynsha birlesken jaýapkershilikpen jalǵa alynǵan zattardy senimdi saqtandyrý múmkindigin berý qajettiligi boldy. Aıta ketý kerek, pýlmen yntymaqtastyq týraly kelisimde qor klıentterin tek pýl qatysýshylarynan saqtandyrý qyzmetterin satyp alýǵa májbúrleýge baǵyttalǵan talaptar joq», - delingen habarlamada.
Qor klıenti pýlǵa kirmeıtin saqtandyrýshyny óz betinshe tańdaı alady. Degenmen, keıbir sharttar bar: saqtandyrý kompanııasy Indýstrııalyq damý qorynyń talaptaryna jáne saqtandyrýdy qamtý deńgeıine saı bolýy kerek. Qor táýekelderdi ártaraptandyrý jáne bólý, sondaı-aq saqtandyrýshylardyń kapıtalyn biriktirý usynylatyn saqtandyrý qyzmetiniń naqty qosymsha kepili dep sanaıdy.
«Evrazııa» saqtandyrý kompanııasy» AQ kommertsııalyq múddelerine keletin bolsaq, onyń qordyń iri múliktik obektileri boıynsha saqtandyrý portfelindegi úlesi 2021 jyldyń basynda saqtandyrýdyń jalpy kóleminiń 56% - dan astamyn quraǵanyn atap ótken jón», - delingen habarlamada.
Agenttik Indýstrııalyq damý qoryna buzýshylyqtardy joıý týraly habarlamany alǵan kúnnen bastap 30 kúntizbelik kún berdi. Habarlama belgilengen merzimde oryndalmaǵan jaǵdaıda, Kásipkerlik kodeksiniń normalaryna sáıkes tekserý júrgiziledi.
