Ónerkásipten shyǵatyn zııandy zattardyń 40%-y elektr energetıkasyna tıesili – mınıstr
Bul týraly QR Ekologııa, geologııa jáne tabıǵı resýrstar mınıstri Serikqalı Brekeshev málim etti, dep habarlaıdy QazAqparat tilshisi.
«Elektr energetıkasyn óndiretin ónerkásip nysandary jyl saıyn orta eseppen 900 myń tonna aýany lastaıtyn zııandy zattar shyǵarady. Bul eldegi barlyq ónerkásipten shyǵatyn zııandy zattardyń 40%-y. Osy oraıda elimizdiń energetıka sektorynda eń ozyq qoljetimdi tehnologııalardy kezeń-kezeńimen engizý jáne ony damytý mańyzdy. Jasyl tehnologııany ilgeriletý jolynda Eýropa Odaǵy elderiniń ozyq qoljetimdi tehnologııalarǵa kóshý tájirıbesi úlken ról atqarady», - dedi Serikqalı Brekeshev elordada ótip jatqan «ECOJER» ІІ halyqaralyq ekologııalyq kongresinde.
Vedomstvo basshysynyń málimdeýinshe, ónerkásip óndirisinen keletin zııandy azaıtý quzyrly organdardyń basym mindetteriniń biri bolyp qala beredi.
«Qazaqstan birqatar zańnamalyq qujattar, damý strategııalary men baǵdarlamalardy qabyldaý arqyly «jasyl tehnologııaǵa» kóshý úshin uıymdyq-quqyqtyq turǵydan negiz jasaǵan Ortalyq Azııadaǵy birinshi memleket. Biz bul strategııany halyqaralyq yntymaqtastyqty eskere otyryp jalǵastyratynymyz sózsiz. Bul jerde memleket, qoǵam, bıznes pen úkimettik emes uıymdardyń ortaq kúsh-jigeri ǵana syn-qaterlerge tótep berip, eldiń turaqty ári qaýipsiz damýyna múmkindik beretinin atap ótkim keledi», - deıdi ol.
Buǵan deıin mınıstr elimizde 2060 jylǵa deıin kómirtegi beıtaraptyǵyna qol jetkizý strategııasy pysyqtalyp jatqanyn málim etti.
