Ónerkásipte robottardy qoldanýdy arttyrý kerek - Asqar Mamın
ASTANA. QazAqparat - Ónerkásipte robottardy qoldanýdy arttyrý kerek. Bul týraly búgin Qazaqstan mashına jasaýshylarynyń V forýmynda QR Premer-Mınıstriniń birinshi orynbasary Asqar Mamın aıtty, dep habarlaıdy QazAqparat.
«Robottardyń ortasha deńgeıi 10 myń jumysshyǵa shamamen 70 robotty quraıdy. Ókinishke oraı, biz salamyzda eki mándi sanǵa da áli jetken joqpyz. Men Ońtústik Koreıa, Japonııa, Sıngapýr syndy 10 myń jumysshyǵa 500-den astam robot keletin damyǵan elderdi aıtyp ta otyrǵanym joq. Bizdiń umtylýǵa tıisti baǵytymyz bar. Onsyz jahandyq básekege qabiletti bolý múmkin emes. Muny barlyǵy aıqyn túsinýi qajet», - dedi Asqar Mamın.
Sonymen qatar ol ónerkásipte jasandy ıntellekt, 3D-prıntıng, robottandyrý, tsıfrlandyrý syndy jańa tehnologııalardy engizý qajettigine nazar aýdardy.
Aıta keterligi, osy jıynda QR Investıtsııalar jáne damý mınıstri Jeńis Qasymbek elimizdiń mashına jasaý salasy damýynyń 8 aılyq qorytyndysyn shyǵarǵan bolatyn. «8 aıdyń qorytyndysynda osyǵan deıingi jyldardy qosa alǵanda shyǵarylǵan mashına jasaý ónimderinen artyq ónimdi eksportqa jónelttik. Negizinen olar Belarýs, Tájikstan, Reseı jáne Qytaı naryqtary. Mashına jasaý sektorynyń jalpy quny 90 mlrd teńgeden asty. Bul ótken jyldyń sáıkes kezeńimen salystyrǵanda 4 esege artyq», - degen edi ol.
