Ónerkásip ónimderiniń kólemi byltyrǵy jyldyń birinshi toqsanymen salystyrǵanda 11,5 paıyzǵa ulǵaıdy
ASTANA. Sáýirdiń 20-sy. QazAqparat /Rýslan Ǵabbasov/ - Birinshi toqsanda aýyl sharýashylyǵyndaǵy ósim 2,4 paıyzdy qurady. Bul týraly búgin Úkimet otyrysynda bıylǵy jylǵy birinshi toqsannyń áleýmettik-ekonomıkalyq damýyna qorytyndy jasaý kezinde Ekonomıkalyq damý jáne saýda mınıstri Janar Aıtjanova málim etti,
dep habarlaıdy QazAqparat.
Onyń sózine qaraǵanda, birinshiden, ónerkásip óndirisi salasynda 2010 jyldyń qańtarynan bastap ósý qarqyny baıqalǵan. Jalpy, ónerkásip ónimderiniń kólemi ótken jyldyń birinshi toqsanymen salystyrǵanda 11,5 paıyzǵa ulǵaıdy. «Birinshi toqsandaǵy eń úlken ósý qarqynyn, ıaǵnı 18,7 paıyzdy óńdeý ónerkásibi kórsetti. Atap aıtqanda, mashına jasaý óndirisiniń kólemi 1,8 ese, hımııa ónerkásibi 1,5 ese, munaıdy qaıta óńdeý óndirisi 25 paıyzǵa, azyq-túlik ónimderi 11 paıyzǵa, sondaı-aq metallýrgııa ónerkásibiniń kólemi 10,5 paıyzǵa ósti.
Al taý-ken óndirý men karerlerdi óńdeý ónerkásibindegi ósim 7,8 paıyzdy qurady. Temir rýdasyn óndirý 27,6 paıyzǵa, shıki munaı 8,4 paıyzǵa jáne tabıǵı gazdy óndirý 8,2 paıyzǵa artty. Atap aıtqanda, ónerkásip óndirisiniń ósimi respýblıkanyń barlyq oblystarynda baıqalǵan.
«Birinshi toqsanda aýyl sharýashylyǵynyń ósýi 2,4 paıyzǵa joǵarylady», dep atap ótti J. Aıtjanova. Mınıstrdiń aıtýynsha, jyl basynan beri qurylys jumystary 8,7 paıyzǵa azaıdy. Osy jyldyń birinshi toqsanynda 1,4 mln. sharshy metr turǵyn úı qoldanysqa berilgen.
