Ónerkásip alpaýyttary ekologııalyq sharalarǵa qansha qarjy jumsaıdy

NUR-SULTAN. QazAqparat – Taý-ken metallýrgııa ónerkásibi men qurylys, hımııa salasynda jumys istep turǵan 18 kásiporyn eldegi eń 50 iri lastaýshy kásiporyndar tizimine kiredi. QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev Úkimet otyrysynda osy kompanııalardyń ekologııalyq mindettemelerdi qalaı oryndap jatqany týraly málime berdi, dep habarlaıdy QazAqparat tilshisi.

«Lastaýshy zattardyń edáýir bóligi ónerkásipke, atap aıtqanda, taý-ken metallýrgııa kesheni sektoryna tıesili. Mınıstrlik 122 iri jáne orta kásiporynmen birlesip atmosferaǵa tastalatyn ekologııalyq shyǵaryndy kólemin azaıtý boıynsha sharalar qabyldaýda.

Atap aıtqanda, taý-ken metallýrgııa ónerkásibiniń, qurylys jáne hımııa salasynyń jumys istep turǵan 18 kásiporny eldiń birinshi sanattaǵy 50 iri lastaýyshtar tizimine kiredi.

Osy kásiporyndarmen naqty ındıkatorlardy qamtıtyn shyǵaryndylardy azaıtý týraly tıisti memorandýmdarǵa qol qoıyldy jáne iske asyryla bastady», - degen vıtse-mınıstr óndiris alpaýyttarynyń árqaısysyna jekeleı toqtaldy.

«Kaztsınk» jaýapkershiligi shekteýli seriktestiginde kúkirt qyshqyly zaýytynda gaz-aýa qospasyn zalalsyzdandyrý jáne súzgi júıesi jabdyqtaryn jańartý arqyly shyǵaryndylar kólemi 53,3 tonnaǵa tómendetildi.

«Alıýmınıı Qazaqstan» kásiporny shyǵaryndylardy azaıtý strategııasy qabyldanyp, emıssııalardy 10 myń tonnaǵa tómendetý úshin 34 mlrd teńge ınvestıtsııalaý josparlaýda», -dedi Qaıyrbek Óskenbaev.

Vıtse-mınıstr «ArselorMıttal Temirtaý» kásipornynyń da ekologııany jaqsartýǵa baǵyttalǵan jospary bar ekenin atady.

«Munda mazýt, suıytylǵan gaz ben qatty otyndy tabıǵı gazǵa aýystyrý, shań tazalaý jabdyqtary men tazartatyn qurylystardy jańartý, sondaı-aq elektr súzgilerin salý jumystary bastaldy. Jalpy «ArselorMıttal Temirtaý» aldaǵy 10 jylda ekologııalyq ahýaldy jaqsartý sharalaryna 830 mln dollardan astam qarjy ınvestıtsııalaýdy josparlap otyr», - dedi vedomstvo ókili.