Ónerge qaıtyp keletinimdi bilgen joqpyn — Syrym Isabaev
ASTANA. KAZINFORM — Kópshilik kózinen talaı jyl tasada júrse de, Syrym Isabaevty tyńdarmandary árdaıym eske alyp turatyn. Al jankúıerleriniń saǵynyshyn basý úshin sahnaǵa qaıta oralǵan ánshi «Búgin LIVE» stýdııasyna qonaq bolyp, jańalyqtaryn bólisti.
— Alǵash ret óner salasyna keldim. Án aıttyq. Bári ádemi boldy. Biraq mamandyq tańdaǵanda men býhgalterlik esep jáne aýdıt degen mamandyqty oqyp bitirgenmin. Án aıtyp, halyqtyń kóńilinen shyǵyp jatqannan keıin bul salam qaldy. Biraq óner joly aýyr jol dep beker aıtpaıdy ǵoı. Ánder saıabyrsyp, stıl ózgerip ketti. Sol kezde men osy mamandyǵymdy da qaldyryp qoımaıynshy dedim. Sol boıynsha jumys istep, damytyp, kásipti de qolǵa alyp istedik, — deıdi Syrym Isabaev.
Araǵa birshama ýaqyt salyp, ánshiniń ónerge qaıta bet burýyna sep bolǵan — tyńdarmandardyń ystyq yqylasy eken.
— Men taǵdyrǵa qatty senetin adammyn. Ónerge qaıtyp keletinimdi de bilgen joqpyn. Biraq halyqtyń ystyq yqylasy, saǵynyshy sezilip turady. Júrgen jerinde «nege án aıtpaı kettiń? Daýysyń jaqsy edi ǵoı» degen sózder de adamdy tebirentip, shabyt beredi. Osy ónerge qaıta kelýimniń bir sebebi — meni tyńdap ósken qazirgi jastar. Solardyń arqasy dep aıta alamyn. «Jalǵyzdyń úni shyqpas, jaıaýdyń shańy shyqpas» dep beker aıtylmaǵan. Sol jigitter qazir qasymda janashyr bolyp, kómektesip júr. Aldaǵy josparym — ózime ujym quryp alý. Ázirge ujymǵa 3 jigit qosyldy. Biraq odan bólek te janashyr baýyrlarym bar. Solardyń bári baǵyt-baǵdar berip jatyr, — deıdi ónerpaz.
Stýdııa qonaǵy jaqynda hıtke aınalǵan «Sol bir sezim» ániniń qalaı týǵanyn aıtyp berdi.
— Taǵdyr degennen shyǵady, «Sol bir sezim» degen án oılamaǵan jerden keldi. Kover jazyp júrgen kezde Shymkent qalasynda toı-tomalaqqa qatysyp júrdik. Sol jerde Nurbol degen jas asaba meniń nómirimdi jazyp alyp, keıin 3-4 ándi jiberipti. Tyńdasam, maǵynasy, aıtylý yrǵaǵy ózime keletindeı bolyp sezildi. Sol ándi satyp alyp, oryndap shyqsam, 1 aptada halyqty eleń etkizip, kóńilinen shyǵa bastady. Keıin sol ánniń avtory Nursát maǵan habarlasyp: «Óz ánim munshalyqty jaqsy shyqty dep oılamadym. Osy ánniń jatqanyna 1,5 jyl boldy. Túrli asabalarǵa usynyp, osyny ánshilerge bershi dep aıtyp júrdim. Qansha adam tyńdady. Biraq osy án sizdi kútip jatqandaı boldy ǵoı» dedi. Biraq ándi de biz ózimizge alǵannan keıin óńdeımiz. Ózimizdiń daýysymyzǵa keltiremiz. Halyqtyń esinde qalatyndaı tustaryn qosamyz. Bári ózinen ózi shyǵyp jatqan dúnıe emes. Bári — eńbek. Halyq bizdi sonsha saǵynyp, jaqsy kórgennen keıin, biz de soǵan jaýap retinde qoldan kelgenshe jaqsy ánmen qýantýǵa tyrysamyz, — deıdi ol.
Eske sala keteıik, birer kún buryn Hulan-Aru atymen tanylǵan Arýjan Bekbolat óner joly, obraz tańdaýy jáne ánshilik tájirıbesi týraly eksklıýzıv suhbat berdi.