Ónerbaevtyń uly bolǵanymyz úshin qatty qysym sezemiz — Marǵulan Nurlan

ASTANA. KAZINFORM — Nurlan Ónerbaevtyń uly óziniń daýysyn synaıtyndar jıi kezdesetinin aıtady. Marǵulan Nurlannyń sózinshe, memleket jáne qoǵam qaıratkeriniń izin jalǵastyrý ońaı emes.

Jibek Joly telearnasynyń «Búgin LIVE» baǵdarlamasyna Nurlan Ónerbaev pen onyń uldary qonaq boldy. Óner ıesiniń qos perzenti de óziniń jolyn jalǵastyryp júr eken.

— Men sonaý 1978 jyly oqý bitirip, mamandyq tańdar kezinde meniń ata-anam eshqandaı talap qoımaǵan. Men mamandyǵymdy ózim tańdadym. Men de balalaryma ondaı talap qoıǵan joqpyn. Ásirese, Maqsatqa. Maqsattyń alǵashqy mamandyǵy — ekonomıst. Odan keıin zańgerlikti oqydy. Bul salada jumys ta istedi. Biraq boıda bar qasıet báribir jatpaıdy eken ǵoı. Balamdy báribir ónerge alyp keldi, — deıdi stýdııa qonaǵy.

Al ekinshi uly Marǵulan Nurlan 5 jasynan bastap mýzyka salasynda bilim alǵan.

— Marǵulandy ónerge 5 jasynan bastap baýlydyq. 6 jasynda Almatydaǵy K. Baıseıitova atyndaǵy arnaıy mektep-ınternatyna oqýǵa berdik. 6-synybynda Astanaǵa aýysyp kelip, osy jerde Shabyttyń janyndaǵy mektepti bitirdi. Keıin kolledjin, sosyn ýnıversıtetin bitirdi. 18 jyl pıanıst retinde oqyǵan mamandyǵynyń búgin jemisin kórip, qazir shákirt tárbıelep, sabaq berip júr, — deıdi Nurlan Ónerbaev.

Marǵulan Nurlan memleket jáne qoǵam qaıratkeriniń izin jalǵaý úlken jaýapkershilik ekenin jetkizdi.

— Nurlan Ónerbaevtyń uly bolǵanymyz úshin qatty qysym sezemiz. Bizdi ákemizben salystyrady. «Seniń daýysyń ákeńdikindeı emes» dep aıtyp jatady. Eger ónerli emes otbasydan ártis shyǵar bolsa, olarǵa jeńilirek. Al kópshilik bizden kóp úmit kútedi. Biz de soǵan saı bolýymyz kerek. Sol úshin kóp ártistiń balalary óner jolyn qýmaıdy dep oılaımyn, — deıdi stýdııa qonaǵy.

Ekonomıka men zańgerlik salalarda kásibı bilim alǵan Maqsat Ónerbaı búginde óner jolynda eńbek etip júr.

— Bizdiń mynadaı bir ustanymymyz bar: «Jaǵalasyp ketti» degennen góri, «jalǵastyryp ketti» degendi estisek durys bolar edi dep oılaımyz, — dep túıindedi ánshiniń uly.

Aıta keteıik, Qosshy qalasynda Nurlan Ónerbaevtyń mýzyka mektebi ashylmaq.