Óner juldyzdary murajaı tamashalaǵandarǵa qyzmet etti
ASTANA. QazAqparat - Ulttyq mýzeıde elimizdiń tanymal óner juldyzdarynyń qatysýymen «Juldyzdy gıd» jobasy bolyp ótti.
Sharada otandyq óner juldyzdary Ulttyq mýzeıge kelýshilerge arnaıy ekskýrsııa júrgizdi. Mýzeı qonaqtary ánshiler men akterlerdi ekskýrsııa júrgizýshisi retinde tanyp, ózderine qajetti aqparattar aldy, dep habarlaıdy mýzeıdiń baspasóz qyzmeti.
«Juldyzdy gıd» jobasy barysynda mýzeıdiń Altyn zalyn - ánshi Altynaı Jorabaeva, Tarıh zalyn - akter Ádil Ahmetov, Táýelsiz Qazaqstan zalyn - ánshi Indıra Rasylhan, Etnografııa zalyn - akter Qýandyq Qystyqbaı, Astana zalyn - ánshi Shaharızat Seıdahmettanystyrdy.
Ekskýrsovod juldyzdardyń óz isterine berilip ketkenderi sondaı, jýrnalısterdiń suraqtaryna da asyǵys jaýap berdi. Altyn zalyn tanystyrýshy Altynaı Jorabaeva óz áserimen bólise kele:
«Alǵashqy tanystyrylymda biraz qobaljydym. Biraq, óz elimizdiń osynsha baılyǵy bar ekenin kórip, ony óz aýzymmen halyqqa tanystyra júrip arqalanyp ketkendeı boldym. Dál qazir alty ret tanystyrylym júrgizdim. Osy alty tanystyrylymda meniń elime degen súıispenshigim alty esege artty desem de bolady», - dedi.
Tarıh zalyn tanystyrýshy tanymal akter Ádil Ahmetov:
«Shynymdy aıtsam, kóptegen oqyǵan málimetterdi qaıta qarap, mýzeıdegi ár jádigermen jeke tanysqanymdy sanamaǵanda, akter retinde bul jumys maǵan qatty qıyndyq týǵyzǵan joq. Sebebi, akter adam sahnada, kınoda ártúrli obrazdar somdaıdy. Al búgin men jaı ǵana kınodaǵy ekskýrsovodtyń rolin somdaýshymyn», - dep búgingi jumysy jańa izdenisterge de bastaýy múmkin ekenin aıtyp ótti.
Táýelsiz Qazaqstan zalyn tanystyrýshy Indıra Rasylhan bolsa:
«Táýelsizdigimizdi alǵan kezde men es bilip qalǵan bolatynmyn. Jáne sol táýelsizdigimizdiń 25 jyldyq ǵumyrynyń kýásimin dep aıta alamyn. Biraq, osy joba aıasynda mýzeıge kelip, «Táýelsiz Qazaqstan» zalyn tanystyrý arqyly biz óz táýelsizdigimiz jaıyndaǵy kóptegen dúnıelerdi bile bermeıtinimizge kózim jetti», - dep bul sharanyń ózi úshin jańalyqqa toly bolǵanyn atap ótti.
Al elimizdiń turmysy men salt-dástúri kórinis tapqan Etnografııa zalyn tanystyra júrip belgili akter Qýandyq Qystaqbaı:
«Mýzeı men teatr bir-birimen tyǵyz baılanysty. Biz sahnada qoıylym arqyly tarıhymyzǵa tereńirek boılaýǵa tyryssaq, mýzeıdegi jádigerler sol tarıhtyń tilinde sóıleıdi. Búgingi is-shara kelýshiler úshin de, juldyzdar úshin de úlken jańalyq boldy. Óıtkeni, osy joba arqyly birinshiden ózimizdi basqa qyrymyzdan kórsetsek, ekinshiden óz tarıhymyz ben dástúrimizdi taǵy basqa qyrynan tanyp jatqan jaıymyz bar», - dep joba jónindegi oılarymen bólisti.
Shara sońynda kelýshilerdiń nazaryna juldyzdardyń qatysýymen kontsert ótti.
