Óner jáne sport salasyndaǵy úzdik joǵary oqý orny ataldy
ASTANA. KAZINFORM — Qazaq ulttyq horeografııa akademııasy óner jáne sport salasyndaǵy úzdik joǵary oqý orny atandy, dep habarlaıdy Mádenıet jáne aqparat mınıstrliginiń baspasóz qyzmeti.
— 2025 jylǵy Ulttyq reıtıng nátıjesinde óner jáne sport salasy boıynsha bilim beretin joǵary oqý oryndary arasynda Qazaq ulttyq horeografııa akademııasy úzdik dep tanyldy. Bul — eldegi joǵary bilim berý salasyndaǵy bedeldi kórsetkishterdiń biri. Reıtıng joǵary oqý oryndarynyń akademııalyq bedeli, bilim berý sapasy, ǵylymı-zertteý qyzmeti jáne túlekterdiń eńbek naryǵyndaǵy suranysy sııaqty negizgi krıterııler boıynsha jasalady. Bul — Akademııa ujymy men bilim alýshylarynyń qajyrly eńbegi men kásibı sheberliginiń nátıjesi. Sońǵy jyldary Akademııa ulttyq jáne halyqaralyq deńgeıde birqatar shyǵarmashylyq jáne ǵylymı jobalardy tabysty júzege asyryp, zamanaýı bilim berý baǵdarlamalaryn engizý arqyly turaqty túrde kóshbasshy mártebesine ıe, — delingen mınıstrlik habarlamasynda.
Akademııa bilim alýshylary bedeldi halyqaralyq baıqaýlarda joǵary nátıje kórsetip, júldeli oryndardy enshilep júr. Oqý ornynda tek Qazaqstannan ǵana emes, álemniń túkpir-túkpirinen kelgen balalar bilim alyp, kásibı turǵyda shyńdalýda. Shákirtter úshin jan-jaqty damýǵa jaǵdaı jasalyp, horeografııa jáne óner salasyndaǵy álemdik deńgeıdegi mamandarmen turaqty túrde sheberlik sabaqtary uıymdastyrylady, sondaı-aq sheteldiń úzdik ýnıversıtetterinde akademııalyq utqyrlyq baǵdarlamasy arqyly bilimderin jetildirý múmkindigi bar.
Memleket basshysy Qasym-Jomart Toqaevtyń bastamasymen kreatıvti art-ındýstrııa salasy elimizde qarqyndy damyp keledi. Osy oraıda Qazaq ulttyq horeografııa akademııasy 2025–2026 oqý jylyna jańadan ashylǵan «Kreatıvti art-ındýstrııa» bilim berý baǵdarlamasy boıynsha qujat qabyldaýdy bastady. Atalǵan baǵdarlama aıasynda elimizdiń osy saladaǵy jetekshi mamandary bilim alýshylarǵa dáris beredi.
Akademııanyń basty maqsaty — horeografııa, ónertaný, art-menedjment jáne kreatıvti art-ındýstrııa baǵyttary boıynsha bilikti kadrlar daıarlap, otandyq mádenıet pen óner salasyna jańa serpin beretin kásibı mamandardyń jańa býynyn qalyptastyrý.
Búginde Akademııa — tek Qazaqstanda ǵana emes, búkil Ortalyq Azııada horeografııa óneri salasyndaǵy jetekshi joǵary oqý orny.
Budan buryn otandyq ónerpaz «La Skala» teatry akademııasynda taǵylymdamadan ótetini habarlandy.