Óner zertteýshi-ǵalym Ámına Nuǵmannyń eńbegi jaryq kórdi
ALMATY. 14 qańtar. QazAqparat /Erbol Turymbetov/ - Búgin QR Ulttyq kitaphanasynda belgili óner zertteýshi-ǵalym, pedagogıka ǵylymdarynyń kandıdaty,
dotsent Nuǵman Ámına Ábdikárimqyzynyń «Qazaqtyń ánshilik dástúri» atty eńbeginiń tusaýkeser rásimi ótti.
Á. Nuǵmannyń bul eńbegi JOO-ǵa oqýlyq retinde jáne jalpy ónersúıer qaýym nazaryna tuńǵysh ret usynylyp otyr. Tusaýkeser rásiminde Qazaqstannyń eńbek sińirgen qaıratkeri, zertteýshi, kúıshi Jarqyn Shákárim 50-jyldarda qazaqtyń ánshilik ónerin jınastyryp, zerttegen Ámına Ábdikárimqyzynyń eńbegine toqtalyp ótti. «Qazaqtyń dástúrli ánshilik ónerin kóp adam zerttedi. Alaıda, Arqa men Jetisý ánshilik ónerin alǵash ret taldaǵan osy Ámına Nuǵman edi. Bul eńbektegi, ásirese, «Qazaq ániniń orfoepııasy» bólimine úlken mán bergen jón. Munda Ámına apaıymyz án sózderiniń aıtylý erejelerin durys saqtaýdy qalyptastyrýǵa úlken eńbek sińirgen», - dedi J. Shákárim.
Kitap «Qazaq ánshilik dástúriniń tarıhynan ocherkter», «Qazaq ánshilik dástúriniń qalyptasýy» jáne «Qazaq ániniń orfoepııasy» atty 3 taraýdan turady. Eńbekti baspaǵa daıyndaǵan ǵalymnyń qyzy Baıan Nuǵman. Kitap 2009 jyly QR Mádenıet jáne aqparat mınıstrligi Aqparat jáne muraǵat komıtetiniń «Ádebıettiń áleýmettik mańyzdy túrlerin basyp shyǵarý» baǵdarlamasynyń aıasynda «Arys» baspasynan basylyp shyqqan.
Ǵalymnyń qyzy B. Nuǵmannyń aıtýynsha, anasynyń bul eńbegi 1986 jyly doktorlyq dıssertatsııa bolyp qorǵalýy tıis bolatyn. Alaıda, sol kezdegi saıası oqıǵalar saldarynan shekteýge baılanysty jaryqqa shyqpaı qalǵan.
Sondaı-aq, shara barysynda belgili jazýshy, ǵalymdar Qabdesh Jumadilov pen Tursynbek Kákishevter de Ámına Ábdikárimqyzy jaıly estelikter aıtyp, ǵalymnyń ótken ómir joly týraly tarıhı derekter keltirdi.
