Óner ýnıversıtetiniń shaǵyn orkestri óńirlerge kontsert berip keldi

dep habarlaıdy QazAqparat.

Aqtóbe qalasynan bastalǵan issapar Qyzylorda, Shymkent jáne Taraz qalalarynda jalǵasyn tapty. Bul saparda sazger, dırıjer Nurlan Bekenov jetekshilik jasaıtyn orta býyn halyq aspaptary orkestri óner kórsetti. Onyń quramyna atalǵan bilim ordasynyń kolledjinde oqıtyn oqýshylar men joǵary býynda, ıaǵnı, bakalavrda, birinshi kýrsta tálim alyp jatqan stýdentter engen.

Kontsert baǵdarlamasynda sazgerler Nurǵısa Tilendıevtiń «Jeńis saltanaty» mýzykalyq týyndysy, Muqan Tólebaevtyń «Kesteli oramal» áni oryndaldy. Negizinen Jeńis kúnine baılanysty ánder shyrqalyp, kúıler tartyldy. Atalmysh orkestr Shámshi Qaldaıaqovtyń «Baqyt kún tilegi», Qapan Mýsınniń «Alma baǵynda», soǵys jyldary shyqqan áıgili áskerı «Kók oramal» ánderin oryndady.

Sondaı-aq jeńis taqyrybyndaǵy birqatar kúıler de shertildi.

Bul shara Álem ártisi, Óner ýnıversıtetiniń rektory Aıman Musaqojaeva bastamashylyǵymen júzege asty. Osy issaparǵa «Nur Otan» partııasy qoldaý bildirgen, sondaı-aq kontsert ótken qalalar da uıymdastyrý sharalarynyń oıdaǵydaı ótýine atsalysqanyn aıta ketken jón.

«Bizdiń saparymyz sátti ótti. Óner súıer qaýym aldynda kontsertter qoıdyq. Uly Otan sǵysynyń ardagerleriniń qatysýymen ótti. Aǵa urpaq ókilderi batalaryn berip, alǵystaryn jaýdyrdy. Aldyńǵy kúni Astanaǵa oraldyq»,- deıdi sazger, dırıjer Nurlan Bekenov.