Óner - uly, onyń ulylyǵyn Habıba apamyz syndy keıýanalarymyz ylǵı da dáriptep ótken - T.Jamanqulov
ALMATY. 23 tamyz. QazAqparat /Ádilet Musahaev/ - Qara shańyraqtyń kóne kózi, osy shańyraqtyń uly týyn kóterip búgingi tańǵa deıin jetken ári arda arystarymyzdyń kózin kórip, qasynda júrgen Habıba apamyz búgin 95 jasqa kelip otyr, bul biz úshin úlken qýanysh. Bul jaıynda búgin Memlekettik syılyqtyń laýreaty, halyq ártisi Tuńǵyshbaı Jamanqulov aktrısa Habıba Elebekovanyń 95 jasqa tolý mereıtoıy kezinde aıtty.
T.Jamanqulov mundaı keıýana, úlken kisilerdiń artyqshylyǵy tek jasynda ǵana emes, olardyń erekshe jaratylysynda, tabıǵatynda ekendigin aıtyp ótti. «Teatr ónerinde, qazaq óneri arqyly óziniń ultyna, eline degen sheksiz mahabbatty osy kisilerdiń ómirimenen, júris-turysy, bolmys, bitimimen óse bilý kerek dep oılaımyn. Habıba Elebekova - qazaq óneriniń búkil tarıhyn ǵana emes, onyń bólek estetıkasyn, asyldaryn erekshe júreginde saqtap kelgen kóne kóz keıýana», -dedi ártis.
Sonymen qatar ol apamyzdyń taǵy biri ereksheligi - búgin sahnaǵa, qasıetti kórermen zalyna úlken basyn ıip, qolyn kókiregine basyp sálem berýi - ózin uly ónerden kishi sanaýy dep atap ótti. «Óner - uly, onyń ulylyǵyn osyndaı keıýanalarymyz ylǵı da dáriptep ótken»,- deıdi T.Jamanqulov
