Óner salasyndaǵy joǵary marapatqa ıe bolǵanym meni shabyttandyrady - Serjan Káýikov

ASTANA. 13 jeltoqsan. QazAqparat - Qazaqstan Respýblıkasynyń Prezıdenti Nursultan Nazarbaev búgin Aqordada «Astana Opera» teatry baletiniń úzdik solısteri Serjan Káýikov pen Taıyr Gataýovty «Qazaqstannyń eńbek sińirgen qaıratkeri» memlekettik nagradasymen marapattady.

Respýblıka Táýelsizdiginiń 22 jyldyǵyna oraı qurmetti marapat solısterge «Memlekettik jáne qoǵamdyq qyzmettegi eńbegi, elimizdiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýda qosqan eleýli úlesi úshin» berildi.

Serjan Káýikov Elbasyna jáne opera men balet ónerin súıer qaýymǵa óz alǵysyn bildirdi. Úzdik solısimiz ártistiń aýyr eńbegine laıyqty baǵa berilgeniniń mańyzdylyǵyn atap ótti. «Óner salasyndaǵy joǵary marapatqa ıe bolǵanym meni shabyttandyrady, alaıda bul tek bastamasy, alda áli alynatyn asýlar bar, biz «Astana Opera» teatrynyń solısteri bolǵandyqtan, bul qurmet bolashaqqa - álemdik mádenı keńistikke jol ashady», - deıdi Káýikov S.

«Astana Opera» teatrynyń úzdik solısi Taıyr Gataýov marapattaý aldynda «Qazaqstannyń eńbek sińirgen qaıratkeri» ataǵy ol úshin eńbegine berilgen eń joǵary baǵa ekenin basyp aıtty. «Men basty partııalardy oryndaǵan talaı spektaklderdiń tusaýkeserinde Prezıdent kelip, teatr trýppasyn quttyqtap edi. Atalǵan marapat burynǵydan da bıik jetistikke qol jetkizýge serpin beretinine senimdimin», - dep atap ótti ártis.

«Qazaqstannyń eńbek sińirgen qaıratkeri» ataǵy - respýblıkaǵa sińirgen orasan zor eńbegi úshin memlekettik jáne qoǵam qaıratkerlerine, ǵylym, mádenıet, óner, óndiris, jáne áleýmettik sala ókilderine beriletin eń joǵarǵy marapat.