Óner salasy «Nesıege mahabbat» atty taǵy bir otandyq fılmmen tolyqty
ALMATY. 10 aqpan. QazAqparat /Ádilet Musahaev/ - Keshe Almatyda «Qazyǵurtfılm» kınostýdııasynyń «Nesıege mahabbat» fılminiń tusaýkeser rásimi ótti.
Fılmniń qoıýshy-rejısseri - QR Jastar syılyǵynyń, Daryn memlekettik syılyǵynyń ıegeri Sábıt Abdyqalyqov, al stsenarıı avtorlary -S. Abdyqalyqov, Nurgeldi Sadyǵulov pen Safýan Ryspaı.
Atalǵan kıno komedııa janrynda túsirilgen. Qoǵamda ár adam jaqsy ómirdi ańsaıtyny belgili. Degenmen óz armandaryn árkim árqalaı júzege asyryp jatady. Fılmdegi basty keıipker ádemi qyzǵa úılengisi keledi, sondaı-aq onyń izdegen adamy óte aýqatty otbasydan shyqqan bolýy kerek. Sánqoı qyzdardyń kóńilin aýlaý úshin ol anasynyń ruqsatynsyz nesıe alyp, turyp jatqan páterin kepildikke qoıady. Alǵan aqshasyna eń qymbat temir tulpardyń birin tańdap mingen jigit, kóptegen máseleni basyna tilep alady.
Avtokólikke mingen jigitke armanyna jetý shaq qalǵandaı kórinedi, degenmen bári birden oryndala bermeıtinine kózi jetedi. Sonymen qatar alǵan nesıesin 30 kúnnen keıin qaıtaryp otyrýy kerek ekeni de ony qatty mazalaı túsedi.
Qoly jetpeıtin qyzdardyń artynan júgirip, bosqa áýre bolyp júrgen jigit janynda júrgen sýretshi ári súıkimdi qyzdyń ózine ǵashyq ekenin sezbeıdi.
Nesıeni qaıtarýdyń sońǵy merzimi kelgende keıipker aqshaǵa shynaıy mahabbat pen senimdi satyp ala almaıtyndyǵyna kózi jetip, ómirdegi eń qundy - pák sezim ekendigin túsinedi.
Fılm 10 aqpannyń bastap otandyq kınoteatrlardan kórsetiledi.
