Óner - ol ómir emes, ol ómirden de asqaq dúnıe - D. Joljaqsynov
ALMATY. QazAqparat - Almatyda ál-Farabı atyndaǵy Qazaq ulttyq ýnıversıtetiniń Stýdentter saraıynda «Otandyq kıno kúni» jobasy aıasynda «Qunanbaı» fılminiń kórsetilimi ótti.
Otandyq kınony damytý aıasynda uıymdastyrylǵan bul is-sharaǵa fılmniń rejısseri ári basty róldi somdaǵan akter Doshan Joljaqsynovtyń ózi qatysty. Ol Qunanbaı zamanynyń negizgi ózegin kórsete bilgen fılmniń 1 aı 18 kúnde túsirilgenimen, oǵan daıyndyqtyń 5 jylǵa sozylǵandyǵyn jetkizdi.
«Daıyndyq barysynda meniń obrazǵa kirip ketkendigim sonshalyq, meniń murnyma sol zamannyń ıisi keletin boldy», - dedi Doshan Joljaqsynov.
Qazaq ádebıetiniń klassıkalyq týyndysy «Abaı joly» epopeıasynda Qunanbaı jıyntyq beıne retinde sýrettelip, Abaıdyń ákesi jaıly oqyrman kóńilinde jaǵymsyz pikir qalyptasqany belgili. Jańa fılm Qunanbaıdy qazaq qoǵamyna basqa qyrynan tanytty. Tarıhı derekterdiń negizinde túsirilgen týyndyda Kenesary taqyryby qozǵalǵan. Qunanbaıdyń bıler keńesinde shyǵarǵan úkimderi men aıtqan baılamdary arqyly «malym - janymnyń, janym - arymnyń sadaǵasy» deıtin qazaq beınesin kórsetýge kúsh salynǵan.
Kórkem fılmniń premerasy 12 mamyrda ótkenimen, tek jeltoqsan aıynda ǵana otandyq prokatqa shyǵaryldy. Deıturǵanmen, týyndy óziniń ádil baǵasyn alyp ta úlgerdi. HІ «Eýrazııa» halyqaralyq kınofestıvaline NETPAK usynǵan «Úzdik Orta Azııa fılmi» atalymy boıynsha Doshan Joljaqsynovtyń «Qunanbaı» fılmi úzdik dep tanyldy.
«Óner - ol ómir emes, ol ómirden de asqaq dúnıe. Sondyqtan, bolar kınoda oınalǵan tulǵalardy biz qarabaıyrlandyra almaımyz, ıelenip te kete almaımyz. Ol bizge úlken boıtumardaı qabyldanǵany bylaı tursyn, ol bizdiń árqaısymyzǵa artylǵan úlken jaýapkershilik, Men bolashaqta Alash zııalylary týraly, Tumar hanshaıym jaıly úlken kórkem týyndy túsirgim keledi. Árıne, ol oıda bar dúnıe. Biraq, bári ýaqyttyń enshisinde» - dedi Doshan Joljaqsynov.
