Óner men mádenıette sybaılas jemqorlyqqa oryn joq
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblystyq departamenti óńirler ishinde tuńǵysh ret «Óner men mádenıette sybaılas jemqorlyqqa oryn joq» atty aktsııa ótkizdi, dep habarlaıdy QazAqparat.
Atalǵan vedomstvo baspasóz qyzmetiniń málimetinshe, shara Elbasy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýynyń 9-baǵytyn júzege asyrý jáne «Rýhanı jańǵyrý: Ózgeristerdi ózińnen basta!» atty baǵdarlama aıasynda uıymdastyrylǵan.
«Paraqorlyqtyń aldyn alý taqyrybynda aqyndar aıtysy ótip, Mańǵystaý óner kolledji stýdentteri daıyndaǵan «Ónerge qııanat» jáne Jańaózen qalasynyń «Asyl sóz» oqýshylar shyǵarmashylyq úıi» ázirlegen «Myń ret bara bergenshe bir ret para ber» atty teatrlandyrylǵan kórinisteri kópshilik nazaryna usynyldy. Aktsııanyń negizgi maqsaty - qoǵamda oryn alyp jatqan óner men mádenıet salasyndaǵy sybaılas jemqorlyq kórinisterine «múldem tózbeýshilik» mádenıetin qalyptastyrý jáne aldyn alý», - dep atap ótedi departamentten.
«Óner men mádenıette jemqorlyqqa oryn joq» atty aktsııanyń tusaýkeserine arnalǵan keshte belgili sazger E.Qulı, tanymal ánshiler A.Kósherov, J.Kóshkinov, M.Ásembaev, N.Ibragım jáne Nurlan Mýsaev, Arǵynbek Qalbaev syndy aıtyskerler, quqyq qorǵaý organdarynyń basshylary, memlekettik jáne bıýdjettik mekeme qyzmetkerleri, mádenıet pen munaı-gaz salasynyń ardagerleri, qarttar úıiniń turǵyndary qatysty. Shara barysynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblystyq departamentiniń basshysy, Ádep jónindegi keńestiń tóraıymy N.Jannazarova sybaılas jemqorlyqqa qarsy kúres jáne onyń aldyn alý jumysy tek memlekettik organdardyń ǵana emes, barshaǵa ortaq is ekendigin ári qoǵamnyń áleýmettik toptarynyń belsendiligine muqtajdyǵyn atap ótti. Sondaı-aq, ol osy úrdis jalǵasyn tabýy úshin ózge óńirlerge úndeý joldady.
Aıta keterligi, qazirgi tańda Mańǵystaý oblysynda óner jáne mádenıet salasynda eki myńǵa jýyq qyzmetker bar jáne osy ýaqytqa deıin olardyń arasynda sybaılas jemqorlyq faktileri tirkelmegen. Degenmen, osy jyl boıy óńirde mádenıet jáne óner salasynyń qyzmetkerlerimen semınar, kórmeler, kezdesýler, dóńgelek ústelder men jıyndar uıymdastyrylmaq.
