Óner" baspasynan "Qazaq óneriniń qaıratkerleri" serııasymen S.Narymbetovtiń kitap-albomy jaryq kórdi,

dep habarlaıdy QazAqparat.

Mádenıet jáne aqparat mınıstrligi Aqparat jáne muraǵat komıtetiniń baǵdarlamasymen "Qazaq óneriniń qaıratkerleri" serııasy boıynsha shyqqan jańa kitaptyń kórkemdik jobasynyń avtory Áshirbek Kópish. Taralymy 2 myń dana. "Satybaldy Narymbetov - bul qazirgi qazaq kórkem óneriniń bıigin, parasatyn, pálsapasyn aıqyndaıtyn esimderdiń biri. Óneri álemge tanymal, resmı de, beıresmı de moıyndalǵan, ómir ustanymy, ómir salty, jalpy bolmysymen sýretkerlik tabıǵattyń mańyzyn, mánisin asha túsetin tulǵa", deıdi kitaptyń alǵysózinde mádenıettanýshy, Halyqaralyq "Alash" syılyǵynyń laýreaty Álııa Bópejanova. 2 myń danamen jaryq kórgen kitap-albomǵa S. Narymbetovtiń merzimdi basylymdarda jaryq kórgen suhbattary, maqalalary, otbasylyq jáne shyǵarmashylyq qyzmetine qatysty sýretteri men ol týraly áriptesteri men qalamger ini-qaryndastary jazǵan materıaldar toptastyrylǵan.

1946 jyly naýryzdyń 7-sinde burynǵy Shymkent oblysy Túrkistan aýdany Ashysaı kentinde ómirge kelgen Satybaldy Jaleluly birneshe proza kitaptarynyń, kınostsenarıılerdiń avtory jáne túrli fılmderdiń qoıýshy rejısseri. Onyń - "Shoq pen Sher", "Kózimniń qarasy", "Qyz jylaǵan" kórkem fılmderi Monte-Karlo, "Kıno-Shok", "Premer Plans", "Arsenals", Berlın, Insbrýk, "Altyn jaýynger", "Shyǵys-Batys" halyqaralyq kınofestıvalderinde júldelerge ıe bolǵan bolatyn. Shyǵarmashylyq qyzmettegi jetistigi úshin 2005 jyly Qazaqstannyń eńbek sińirgen qaıratkeri, 1996 jyly Memlekettik syılyqtyń jáne "Qurmet" ordeniniń ıegeri atandy.