«Óner barysy»: Juldyzdar arasynda qazaq kúresinen týrnır ótedi
Mundaı aýqymdy shara naýryz aıynda Astana qalasynda ótkiziledi. Bul týraly belgili aqyn Balǵynbek Imashev áleýmettik jeli arqyly habarlady.
«Súıinshi habar! Bilek pen júrek birigetin «Óner barysy» degen jobany qolǵa alyp otyrmyz. Tanymal ánshiler, aqyndar, jaıdarmanshylar, akterler jáne t.b óner ıeleri qazaq kúresinen baq synaıtyn bolady», - delingen aıtyskerdiń «Instagram» paraqshasynda.
Aıta keteıik, «Óner barysy» byltyr birinshi ret Qostanaı oblysynda ótken-di. Oblystyq mádenıet basqarmasynyń basshysy Erlan Qalmaqovtyń sózinshe, mundaı sharanyń basqa óńirlerde jalǵasýy qazaq kúresiniń buqaralyq sıpat alýyna septigin tıgizedi.
«Bul jobaǵa oblystyq qazaq drama teatrynyń ártisi Tólendi Álqoja bastamashy boldy. Mádenıet basqarmasy ártistiń bul usynysyn qoldady. 1-2 aı daıyndalyp, mádenıet jáne óner qyzmetkerleriniń kúnine oraılastyryp ótkizdik. Osyndaı aýqymdy jarystyń basqa óńirlerde, ásirese Astanada ótetinine qýanyshtymyz. Bul «Óner barysynyń» jańa deńgeıde shyqqany dep bilemiz. Eń bastysy, atalǵan týrnır «Rýhanı jańǵyrý» baǵdaralamasymen mazmundas», - deıdi basqarma basshysy.
Byltyrǵy týrnırge 20-40 jas aralyǵyndaǵy otyzdan astam áýesqoı sportshy qatysty. Ideıa avtory Tólendi Álqoja aıtqandaı, «Jastar jylynda» óner ıeleriniń arasyndaǵy sport jarystaryna kóptep kóńil bólinedi.
«Bizdiń byltyrǵy týrnırde eshkim júlde úshin talasqan joq. Jarysqa kelgenderden túsken qarjy Jankeldın aýdanynyń ortalyǵynda turatyn segiz jasar Aqerke Jeksenbaıǵa kóp fýnktsııaly estý apparatyn satyp alýǵa jumsaldy. Qaıyrymdylyq maqsatta ótkizsek te, jeńimpazǵa syıaqy taǵaıyndadyq. Aıta keterligi, Elordada ótkeli otyrǵan jarysqa Qostanaıdyń «Óner barysyn» qatystyrsaq, jarystyń aýqymy odan saıyn keńeıedi», - dedi T.Álqoja agenttik tilshisine bergen suhbatynda.
