«Óner barysy» týrnırine bıletti qaıdan alýǵa bolady
ASTANA. QazAqparat - 21 naýryzda ótetin «Óner barysy» týrnırinde juldyz-balýandar eki salmaq boıynsha ózara myqtyny anyqtaıdy, dep habarlaıdy QazAqparat tilshisi.
«Ótkende saraptap, sanap qarap edik, jobaǵa qatysýshylardyń (Instagramdaǵy) oqyrman sany 12 mıllıonǵa jetedi eken. Endi sony 4 mıllıony bir-birin qaıtalamaıtyn taza oqyrmandar bolsa, jobanyń jalpy jarnamasyn qalaı jasalatynyn, daqpyrty qalaı ketetinin ózderińiz baǵamdaı berińiz. Bul jobaǵa qatysýshylar jalpyǵa úlgi bolary anyq. Jobany kórsetkeli otyrǵan «Habar» arnasyna alǵys bildiremiz», - deıdi «Óner barysy» jobasynyń prodıýsseri Meıirjan Álibek Astanada ótken baspasóz máslıhatynda.
Onyń aıtýynsha, týrnırge qatysýǵa 100-ge tarta adamnan ótinim kelip túsken. Alaıda olardyń tek 18-i tańdalyp alynypty.
««Qazaq handyǵy» fılminde Jánibek hannyń rólin somdaǵan akter Erkebulan Daıyrovpen suhbattasyp otyrsam, «maǵan elikteıtin tym bolmaǵanda eki bala Qazaq kúresine barsa, meniń júldem sol» dep jatyr. «Óner barysy» - dástúrimiz dáriptelip, saltymyz saltanatyn quratyn joba bolady dep kútilýde», - deıdi ol.
Joba prodıýsseriniń aıtýyna qaraǵanda, juldyzdar eki salmaq boıynsha ózara baq synasady. ıAǵnı, juldyzdar 75 kelige deıin jáne 75 keliden joǵary salmaq dep bólinip, júldeni sarapqa salady.
Astana qalasynyń Mádenıet jáne sport basqarmasynyń basshysy Bolat Majaǵulov baspasóz máslıhatynda «Óner barysy» týrnırine bıletti qaıdan alýǵa bolatynyn aıtyp ótti.
«Bıletter qalanyń barlyq kassalarynda satylady. Sondaı-aq, «Tıketon» jáne «Top-tıket» saıttarynan da elektrondy bılet ala alasyzdar. Bılet baǵasy qoljetimdi - 1000-3000 teńge aralyǵynda», - deıdi Bolat Majaǵulov.
Eske sala ketsek, «Óner Barysy» respýblıkalyq týrnıri ótetinin keshe habarlaǵan bolatynbyz.
Jıyrmaǵa jýyq palýan chempıondyq beldikti sarapqa salady. Olardyń ishinde birde-bir kásipqoı sportshy joq. Biraq olardy búkil Qazaqstan halqy tanıdy - tatamıge tanymal artıster men mýzykanttar shyǵady. Ánshiler, aıtyskerler, akterler, KTA-ǵa qatysýshylar ulttyq sport túrinen sheberlik baıqasady.
Qaırat Nurtas, Abaı Aıazbaev, Serik Ibragımov, Meıirjan Tórebaev, Amangeldi Óteshov, Asylhan Tólepov, Artýr Tólepov, Aıan Ótepbergen, Nurlan Musaev, Erkebulan Daıyrov, Álibek Serǵalıev, Nurbolat Abdýllın, Ardak Baıǵabyl, Ǵalym Mahambetov, Aqbolat Ótebaı, Syrymbet Bıbosynov, Hamıt Erdehan jáne basqalary boz kilemde beldesedi.
