Óner adamynyń armany men maqsaty basqa bolady - Svetlana Aıtbaeva Dımash týraly aıtty

ALMATY. KAZINFORM – Ortalyq Azııa áıelderiniń forýmy barysynda álemge áıgili ánshi Dımash Qudaıbergenniń anasy Svetlana Aıtbaeva bala tárbıesine qatysty aqyl-keńesin aıtty.

Ánshiniń anasy daryndy bala tárbıeleýdiń qupııasymen bólisti.

«Ónerli balany tárbıeleý qıyn jáne onaı. Óner adamynyń armany, maqsaty basqa bolady. Eń aldymen balany túsiný kerek. Sondaı-aq onyń boıyndaǵy daryndy kóre bilý qajet. Ata-analarǵa aıtarym, balańyzdyń ónerge degen qulshynysy bolsa, ándi súıse, kúıdi tyńdaı bilse, mýzykany jaqsy kórse, onda balanyń jaǵdaıyn jasańyz. Barynsha túrli úıirmelerge qatystyrý kerek», - dedi «Qurmet» ordeniniń ıegeri.

Svetlana Aıtbaeva bala armanyna sený kerek ekenin tilge tıek etti.

«Dımash kishkentaı kezinde teledıdardyń aldynda turyp, Djekı Chanmen kezdeskim keledi, ony ómirde kórgim keledi dep armandaıtyn. Akterdiń qımyl- qozǵalysyn qaıtalaıtyn. Dımash óz armanyna sendi, bizde sendik. Birneshe jyldan keıin Dımash ańyz adammen kezdesti»,- dedi ol.

Sondaı-aq ol bala tárbıesinde ata men ájeniń róli zor ekenin jetkizdi.

«Úlken kisilerdiń tárbıesinen qol úzbeý kerek. Mine, sol kezde ǵana eljandy, ultjandy, el úshin, memleket úshin qyzmet etetin, jany da, rýhy da qazaqylyqqa toly, sondaı bir jaqsy azamat shyǵady», - deıdi ol.

Aıta keteıik, buǵan deıin ıtalııalyq «Pensiero» basylymy Dımash Qudaıbergen týraly maqala jarııalady.