Óner adamdary paramen ustalǵan Erlan Bilálǵa arasha tústi
ALMATY. QazAqparat - QR Teatr óneri qaýymdastyǵy paramen ustalǵan teatr dırektory Erlan Bilálǵa arasha tústi, dep habarlaıdy QazAqparat tilshisi.
Búgin ótken baspasóz máslıhatynda atalǵan oqıǵaǵa teatr óneriniń ókilderi óz pikirlerin bildirdi.
Óner ókilderi bul jaǵdaıdy ónerge jasalǵan qııanat dep esepteıdi.
«Sońǵy kezderi alypty, beripti, qylmys jasapty degendi ǵana estımiz. Al men ony biletin adammyn. Ol kóz aldymda ósti. Bireýdiń ala jibin attamaǵan. Sengish, adal, ańqaý bireýlerdiń qıturqy áreketiniń qurbany bolyp otyr. Ónerde qubylys bolǵan tulǵanyń bul jaǵdaıy janymyzǵa batyp otyr. Mundaı kek alý, ósh alý kisilikke jatpaıdy. Aǵyn - aq, qarasyn qara deńizder. Biz ótirik aıtatyn jastan kettik», - dedi Qazaqstan Jazýshylar odaǵynyń tóraǵasy Nurlan Orazalın.
Al Qazaqstan Teatr qaýymdastyǵynyń prezıdenti, halyq ártisi Asanáli Áshimov Erlanǵa para bergen azamattardy da jazaǵa tartýdy surady.
«Erlannyń adal azamat, taza jigit ekenin halyq aıtady. Osyndaǵy jastar túnimen uıyqtamaı, Erlandy qorǵap jyly sózderin aıtyp jatyr. Damyǵan elderde ustap bergen adam da jazalanady. Sondyqtan muny uıymdastyrǵan adamdy sotqa shaqyramyn», - dedi Asanáli Áshimov.
Rejısser Ashat Maemırov quqyq qorǵaý organdaryna ǵana tıesili sýretterdiń ınternetke qalaı tarap ketkenine tańdanys bildirdi.
«Biz bul týraly saýal jiberetin bolamyz. Sýretter tek qana tergeýde bolý kerek. Sot sheshiminen soń belgili bolýy tıis», - dedi ol.
Al Káris teatrynyń dırektory Lıýbov Nı qandaı teatrlardyń ǵımaratty jalǵa berýge quqyly ekenin aıtty.
«Eger teatr memlekettik bıýdjetke qarasa, jalǵa berýge bolady. Biraq jalaqysy túgel bıýdjetke ketedi. Biraq men úshin teatr zalyn jalǵa berý tıimsiz. Sebebi onyń sýy, jaryǵy, dybysy degen shyǵyndar óte kóp. Memlekettik qazynaǵa qaraǵan teatrlar shyǵyndaryn jabý úshin jalǵa beredi. Ol qylmys emes. Biraq ol qarjy memleket bıýdjetine ketýi tıis», - dedi Nı Lıýbov.
Onyń aıtýynsha, qazir Erlan Bilál densaýlyǵy syr berip, úıinde jatyr.
Eske sala keteıik, Almatyda M.Áýezov atyndaǵy Qazaq memlekettik akademııalyq drama teatrynyń dırektory, belgili akter Erlan Bilál 1,5 mln teńge kóleminde para alyp jatqan jerinen ustalǵan bolatyn.
