Óner adamdary onlaın kontsert berip, dáris ótkizýde
NUR-SULTAN. QazAqparat - Adamzat balasynyń basyna tóngen náýbet bizdi de aınalyp ótpedi. Tarıhta qanshama juqpaly aýrýlar bolǵan. Ǵylym damymaǵan, tehnıka bolmaǵan zamannyń ózinde saqtyq sharalaryn jasaǵandar aman qalǵan.
Amandyqtyń jalǵyz joly - úıden shyqpaý. Aldyńǵy sheptegi qyzmetkerler bolmasa, basqasy onlaın jumysqa kóshti. Ustazdar da. Al óner salasyndaǵy ustazdyń basty qarýy - áni, kúıi, jyry. Tarıhta aýyryp ne qaıǵydan búk túsip jatyp qalǵandardy «ánmen, kúımen emdepti» degen mysal kóp. Sol dástúrdi jańǵyrtyp, óner ıeleri qońyr úndi dombyra men kóne qobyz sarynymen halyqtyń alańdaýly kóńilin baspaqqa kiristi.
Mádenıet jáne sport mınıstrligine qarasty Qurmanǵazy atyndaǵy Qazaq ulttyq konservatorııasynyń ustazdary úıden shyqpaı, biri - kontsert , biri - sheberlik dárisin berýdi bastady. Ónerpazdardyń Facebook jelisindegi jeke paraqshalarynda #ÓNERONLINE heshtegimen bastalǵan dástúr tótenshe jaǵdaı aıaqtalǵansha jalǵaspaq.
Qurmanǵazy atyndaǵy Qazaq ulttyq konservatorııasynyń aǵa oqytýshysy Maqsat Medeýbek 25 naýryzda «Qobyz – Qorqyttan qalǵan ańyz» , 26 naýryzda Baýyrjan Bekmuhanbettiń «Jetisýdyń ońtústik shyǵysyndaǵy kúıshilik dástúri» atty lektsııa-kontsert berdi. Búgin 27 naýryzda «Halyq mýzykasy» fakýltetiniń dekany, PhD doktory Erjan Jámeńkeevtiń «Qazaqtyń dombyradaǵy ázil kúıleri» taqyrybyndaǵy dárisi tikeleı efırde ótti.
