Óner adamdary halyqty mádenıetke tárbıeleıdi – opera ánshisi

ASTANA. KAZINFORM – Óner adamdary halyqty mádenıetke tárbıeleıdi. Mundaı pikirdi búginde Italııanyń Arrıgo Boıto atyndaǵy Parma konservatorııasynda bilimin jetildirip jatqan otandyq opera ánshisi Áıgerim Altynbek bildirdi.

- Halqymyzdy tárbıeleý úshin opera janry qajet. Óıtkeni, opera – mádenıettiń eń bıik shyńy. Ol bizge artyq etpeıdi. Qazirgi ýaqyttaǵy qýanarlyq jaıttardyń biri – ósip kele jatqan jasóspirimder, jas shákirtter. Olardyń qyzyǵýshylyǵy bar. Jalpy, óner adamdary halyqty mádenıetke tárbıeleıdi. Búginde bári Instagram-daǵy ádemi ómirlerin kórsetip, jeńil dúnıege qyzyǵýshylyqty arttyrýda. Biraq, sol telefonnyń arǵy jaǵynda da úlken eńbek jatyr, - dedi Áıgerim Altynbek Kazinform agenttigine bergen suhbatynda.

Sonymen qatar ol shetelge bilim alý úshin elden ketý qıyn bolǵanyn jasyrmady.

- Qazaqstanda bilim alyp júrgende dostarym, týystarym janymda boldy. Ózim Qyzylordadan, qazaqy jerden shyqqan qyzbyn. Sondyqtan shetelge ketý qıyn boldy. Óıtkeni, aldyńda ne kútip turǵanyn bilmeısiń. Búginde istep jatqan jumysym, eńbegim arqyly qazaq eliniń atyn shyǵarsam, men úshin sol mańyzdy. Kontsertke, konkýrsqa barǵan saıyn meni «qazaq, Qazaqstannan» dep tanystyrǵan kezde kórgen qıyndyqtardyń bárin umytamyn. Bul jerde álemniń túpkir-túpkirinen kelgen vokalıster kóp. Sondyqtan kúndelikti ómiriń - jarys. Bir kún eshteńe istemeseń qataryńnan qalyp qoıǵandaı sezinesiń,- dedi opera ánshisi.

Aıta keteıik, buǵan deıin opera ánshisi Áıgerim Altynbek bir adamdy kýmırim dep aıta almaıtynyn, adamdardyń operaǵa sýretke túsý úshin emes, mýzyka tyńdaý úshin barǵanyn qalaıtynyn aıtqan edi.