Óndirýshilerge arnalǵan jańa tsıfrlyq platforma iske qosyldy: tirkeý tolyq onlaın

ASTANA. KAZINFORM — «Qazaqstandyq taýar óndirýshileriniń tizilimi» tsıfrlyq platformasy iske qosyldy. Ol e-ondiris.gov.kz saıtyndaǵy barlyq paıdalanýshylarǵa qoljetimdi jáne barlyq bıznes búgin tirkeýge ótinish bere alady. Bul týraly Úkimet málim etti.

— Taýarlardyń shyǵý tegin rastaýdyń burynǵy mehanızmimen salystyrǵandaǵy Tizilimniń basty aıyrmashylyǵy – barlyq protsesster tolyq tsıfrlandyrylǵan. Ótinishterdi berý, olardy tekserý jáne sheshim qabyldaý tolyǵymen onlaın rejıminde júzege asyrylady, bul barlyq kezeńderde ashyqtyq pen baqylaýdy qamtamasyz etedi, — atap ótti QR Ónerkásip jáne qurylys mınıstri Ersaıyn Naǵaspaev.

Ekinshiden, protsess bıýrokratııadan arylady. Júıe basqa memlekettik bazalarmen ıntegratsııalanyp, qujattar sanyn qysqartýǵa jáne bızneske túsetin ákimshilik júktemeni tómendetýge múmkindik beredi.

Úshinshiden, bul qyzmetti memlekettik organdar jeke aýdıtorlar men sarapshylardyń qatysýynsyz tegin kórsetedi. Mınıstr jańa júıege tıimdi ótý úshin buryn qazaqstandyq óndirýshiler mártebesin rastaǵan 1800-den astam ındýstrııalyq sertıfıkattardyń ıeleri Tizilimge avtomatty túrde aýystyrylǵanyn atap ótti. Bul kompanııalar bir aı ishinde júıede qajetti málimetterdi tolyqtyryp, ótinimdi ETsP arqyly rastaýy qajet. Qazirde jańa platformada myńǵa jýyq kompanııa tirkelgen.

Jalpy alǵanda, Tizilim memlekettik qoldaýdyń nysanalylyǵy men ashyqtyǵyn jáne ony naqty óndiristik qyzmeti bar kásiporyndarǵa maqsatty túrde jetkizýdi jaqsartý úshin quryldy.

Aıta keteıik, Bektenov ınvestorlarmen óńdeý ónerkásibin damytý máselelerin talqylady.