Óndirýshiden tutynýshyǵa deıin: Elde ettiń ústeme baǵasy qalaı tómendetilmek
ALMATY. KAZINFORM — Qazaqstanda sıyr etin óndirýshiler kelisin orta eseppen 2 800–3 300 teńgeden satsa, dúkender men bazarlarda et baǵasy 6 000 teńgege deıin barady. Aýyl sharýashylyǵy mınıstrligi óndirýshi men tutynýshy arasyndaǵy baǵa aıyrmasyn azaıtý úshin fermerlerdiń ónimin deldalsyz satýǵa múmkindik beretin saýda oryndaryn kóbeıtýdi usyndy.
Muny Almaty oblysynda jýrnalısterge arnalǵan baspasóz týry barysynda aýyl sharýashylyǵy vıtse-mınıstri Azat Sultanov málimdedi.
Onyń aıtýynsha, aýyl sharýashylyǵy taýaryn óndirýshiler satatyn ettiń baǵasy sharýashylyqtyń sanatyna jáne maldyń qońdylyǵyna baılanysty.
— Qazir aýyl sharýashylyǵy taýaryn óndirýshilerdiń sıyr etin satý baǵasy sharýashylyqtyń sanaty men maldyń qońdylyǵyna qaraı orta eseppen 2 800–3 300 teńge aralyǵynda. Alaıda saýda sórelerinde jumsaq ettiń bir kılogramy 6 000 teńgege deıin jetetinin kórip otyrmyz. Sondyqtan fermer suranysqa ıe ónim óndirgenimen, nege odan jaqsy paıda taýyp, tabysyn arttyra almaı otyr degen oryndy suraq týyndaıdy. Osy baǵytta ákimdikter jumys istep jatyr, — dedi Azat Sultanov.
Aýyl sharýashylyǵy mınıstrligi óndirýshi men tutynýshy arasyndaǵy baǵa aıyrmasyn azaıtý úshin fermerlerdiń ózi tikeleı sata alatyn saýda alańdaryn damytýdy qarastyryp otyr.
Vıtse-mınıstrdiń aıtýynsha, mundaı joba Almatyda júzege asyrylǵan. Qaladaǵy kommýnaldyq bazarlardyń birinde aýyl sharýashylyǵy óndirýshilerine taýaryn deldalsyz satýǵa múmkindik berilgen.
Bul tájirıbeni Almaty oblysynda da qoldanyp kórmek.
— Oblysta fermerlerge arnalǵan birneshe bazar salý jobasy júzege asyrylady. Onda sanıtarııalyq talaptarǵa saı, saýda jasaýǵa qolaıly jaǵdaı jasalady. Oblys ákiminiń tapsyrmasy boıynsha mundaı oryndar tek aýyl sharýashylyǵy taýaryn óndirýshilerge berilýi kerek. Deldaldarǵa da, alypsatarlarǵa da emes, tikeleı ónim óndirýshilerge usynylady, — dedi vıtse-mınıstr.
Aýyl sharýashylyǵy ónimderin ótkizýdiń iri arnalarynyń biri — «Altyn Orda» bazary. Azat Sultanov qyzmetkerlerine tamaq jasaý úshin osy bazardan etti kılogramyna shamamen 3 600 teńgeden satyp alatyn kásiporyndardyń birin atady.
— Keıbir saýda oryndarynda baǵa halyq úshin qolaıly ekenin kórip otyrmyz, — dedi ol.
Almaty oblysy ónimdi óńdeýge basymdyq beredi
Vıtse-mınıstr Almaty oblysynyń eldegi eń iri qalany azyq-túlikpen qamtamasyz etýdegi mańyzyn da atap ótti. Óńir aýyl sharýashylyǵy ónimderin óndiretin negizgi aımaqtardyń biri sanalady. Al Almatyǵa jaqyn ornalasýy jergilikti sharýalarǵa ónimin ótkizýge qolaıly múmkindik beredi.
Azat Sultanovtyń aıtýynsha, oblys aýyl sharýashylyǵy shıkizatyn óndirýmen ǵana shektelmeı, ony óńdeýge de basymdyq berip otyr.
— Munda et jáne sút ónimderin óndirisi jaqsy damyǵan. Jalpy, Almaty oblysy azyq-túlik sebetine kiretin negizgi taýar toptary boıynsha óz qajettiligin ózi qamtamasyz etedi. Sonymen qatar óndiris kólemi men ónim túrlerin kóbeıtý baǵytynda jumys júrgizip jatyr, — dedi ol.
Eske salsaq, aýyl sharýashylyǵy mınıstrligi sharýalarǵa sýbsıdııa túrlerin 2 esedeı qysqartqan edi.
