Óndiristik jaraqat alǵan ekibastuzdyq jumys berýshiden 5 mln teńge óndirip aldy

PAVLODAR. KAZINFORM — Ekibastuz qalasynyń turǵyny «Bogatyr Kómir» JShS-de eńbek sharty boıynsha jol jóndeýshi bolyp jumys istegen. 

2012 jyldyń kókteminde qyzmettik mindetterin oryndaý kezinde jazataıym oqıǵaǵa ushyraǵan. Relsti kesý kezinde paıda bolǵan metall jaryqshaǵy kózine kirip ketken, sonyń saldarynan ol kórmeı qalǵan.

— Tergeý jumys berýshiniń 100% kinásin jáne qyzmetkerdiń tolyq kinásizdigin anyqtady. Er adamǵa qaıta tekserý merziminsiz ІІІ toptaǵy múgedektik taǵaıyndaldy. Sondaı-aq 55% kásiptik qabiletin jáne 50% jalpy eńbekke qabiletin joǵaltý anyqtaldy. Jábirlenýshiniń ótinishine tatýlastyrý komıssııasy moraldyq zııandy óteý ótemaqy somasyna qosylmaǵany týraly jaýap bergen. Jábirlenýshi kezdeısoq jaǵdaı onyń ómir súrý jáne jumys isteý qabiletin aıtarlyqtaı shektep, uzaq emdelýdi qajet etetinin aıtyp, JShS-dan moraldyq shyǵyndy óndirý týraly talap qoıýmen sotqa júgingen, — dep habarlady oblystyq sottyń baspasóz qyzmetinen.

Birinshi satydaǵy sot talap qoıýdy qanaǵattandyryp, JShS-dan jábirlenýshiniń paıdasyna moraldyq zııandy óteý retinde 5 mln teńge óndirdi.

Kompanııa oqıǵanyń bolǵanyna kóp ýaqyt ótkenin alǵa tartyp, ótemaqy mólsherin azaıtý qajettigin talap etip, apellıatsııalyq satyǵa shaǵym túsirgen.

Azamattyq kodekstiń 952-babynyń 2-tarmaǵyna sáıkes, moraldyq zııandy óteý mólsherin aıqyndaý kezinde jábirlenýshiniń sýbektıvti baǵasy, zardaptardyń aýyrlyǵy jáne nazar aýdarýǵa turarlyq ózge de mán-jaılar eskeriledi.

Pavlodar oblystyq soty is materıaldaryn zerdeleı kele, ótemaqy mólsheri negizdilik pen ádildik ólshemsharttaryna sáıkes keledi dep tanyp, birinshi satydaǵy sottyń sheshimin negizdi dep qaldyrdy.

Nátıjesinde birinshi satydaǵy sottyń sheshimi ózgerissiz qaldyryldy. Qaýly zańdy kúshine endi.

Eske sala keteıik, Ekibastuzda daýyldan zardap shekken áıeldi qutqarý múmkin bolmady.