Óndiristik jaraqat alǵan adam jumysyn jalǵastyra ala ma
ASTANA. KAZINFORM — Óndiristik jaraqat nemese kásiptik aýrý saldarynan eńbekke qabilettiligi tómendegen azamattarǵa kásiptik eńbekke qabilettilikten aıyrylý dárejesi (KEQAD) belgilenedi, dep habarlaıdy qala ákimdiginiń resmı saıty.
Onyń tártibi, negizderi jáne qaıta kýálandyrý erekshelikteri jaıly elordanyń Kommýnıkatsııalar qyzmetinde ótken brıfıngte Astana qalasy boıynsha Halyqty áleýmettik qorǵaý salasyndaǵy retteý jáne baqylaý komıteti departamenti basshysynyń orynbasary Lázzat Sartymbetova túsindirip berdi.
Onyń aıtýynsha, KEQAD belgileý óndiristik jaraqat alǵan nemese kásiptik aýrýǵa shaldyqqan qyzmetkerler úshin ózekti bolyp sanalady. Bul rette KEQAD pen múgedektikti ajyrata bilý mańyzdy. KEQAD óndiristik jaraqat nemese kásiptik aýrý saldarynan adamnyń kásibı nemese qyzmettik mindetterin oryndaý qabiletiniń qanshalyqty tómendegenin kórsetedi.
Kásiptik eńbekke qabilettilikten aıyrylý dárejesi paıyzben belgilenedi: 5-29, 30-59, 60-89 jáne 90-100 paıyz.
— Saraptama júrgizý kezinde óndiristik jaraqattyń nemese kásiptik aýrýdyń saldary, aǵza fýnktsııalarynyń buzylý deńgeıi, jumysty jalǵastyrý múmkindigi, eńbek jaǵdaılaryn ózgertý, biliktilikti tómendetý nemese arnaıy jumys ornyn qurý qajettiligi eskeriledi. Mańyzdysy — dıagnozdyń ózi KEQAD paıyzyn anyqtamaıdy. Birdeı aýrýy bar eki adamnyń kásiptik eńbekke qabilettilikten aıyrylý dárejesi aýrýdyń saldary men atqaratyn jumysynyń sıpatyna baılanysty ártúrli bolýy múmkin. Medıtsınalyq-áleýmettik saraptamaǵa (MÁS) joldamany medıtsınalyq uıym rásimdeıdi. Onda densaýlyq jaǵdaıy, tekserý nátıjeleri, emdeý jáne ońaltý týraly málimetter kórsetilýi tıis, — deıdi departament ókili.
Sonymen qatar MÁS óndiristik jaraqat nemese kásiptik aýrý faktisin anyqtamaıdy. Sarapshylar rastalǵan óndiristik jaǵdaıdyń saldaryn jáne kásiptik eńbekke qabilettiliktiń shektelý dárejesin baǵalaıdy.
KEQAD belgilenýi eńbek qyzmetine avtomatty túrde tyıym salýdy bildirmeıdi.
Densaýlyq jaǵdaıyna qaraı adam eńbek jaǵdaılaryn ózgerte otyryp, jumys ýaqytyn qysqartý, zııandy faktorlardy alyp tastaý, jumys kólemin nemese sıpatyn ózgertý, ne arnaıy jumys ornyn qurý arqyly jumysyn jalǵastyra alady. Belgili bir jumysty jalǵastyrý múmkindigi medıtsınalyq qarsy kórsetilimder men belgilengen kásiptik eńbekke qabilettiliktiń shektelý dárejesin eskere otyryp aıqyndalady.
KEQAD 6 aıǵa, 1 jylǵa, 2 jylǵa, 5 jylǵa nemese qaıta kýálandyrý merziminsiz belgilenýi múmkin.
Merzim densaýlyq jaǵdaıyn, ońaltý boljamyn, emdeý nátıjelerin jáne buzylǵan fýnktsııalardy qalpyna keltirý múmkindigin eskere otyryp anyqtalady.
— Qaıta kýálandyrý kezinde densaýlyq jaǵdaıynyń dınamıkasy, emdeý men ońaltýdyń tıimdiligi, kásibı shekteýlerdiń saqtalýy jáne eńbekke qabilettilikti qalpyna keltirý múmkindigi baǵalanady. Sondyqtan buryn belgilengen paıyz avtomatty túrde uzartylmaıdy, ár joly saraptamalyq baǵalaý júrgiziledi. Azamat MÁS sheshimi boıynsha túsindirme alýǵa jáne ony zańnamada belgilengen tártippen shaǵymdanýǵa quqyly. KEQAD anyqtaý kezinde dıagnozdar sany emes, óndiristik jaraqattyń nemese kásiptik aýrýdyń saldary jáne olardyń kásibı qyzmetke áseri eskeriledi. Obektıvti baǵalaý júrgizý úshin tolyq medıtsınalyq qujattama men eńbek qyzmeti týraly málimetterdi usyný qajet. MÁS júıesi saraptamalyq sheshimderdiń obektıvtiligi men qoljetimdiligin arttyrý maqsatynda jetildirilýde, onyń ishinde tsıfrlandyrý jáne syrttaı formatty damytý arqyly, — dep túıindedi sózin spıker.
Budan buryn óndiristik jaraqattaný kórsetkishi eń joǵary óńirler ataldy.
