Óndiristik fıltr shıkizatyn ózimiz óndirýge tyrysyp jatyrmyz – «Altyn sapa» jeńimpazy
ASTANA. KAZINFORM – Qazaqstan kásipkerleri úshin basty kásibı oqıǵa sanalatyn «Altyn sapa» baıqaýynda bıyl «Jyldyń úzdik taýary» nomınatsııasyn «AZIıAFILЬTR» kompanııasy jeńip aldy. Kompanııanyń jetekshisi ári negizin qalaýshy Indıra Nurlan óndiristegi jetistikteri men saladaǵy jańa úrdister týraly baıandap berdi.
Bıznes ókiliniń aıtýynsha, respýblıkalyq deńgeıdegi marapat kompanııa úshin tek kásibı baǵa emes, ujym jumysyna berilgen úlken qoldaý.
– Eń birinshi sezim – qýanysh. Al eń bastysy – eńbegimizdiń elenýi. Komandanyń qýanyshyn kórgende bul jeńistiń bizdiń ortaq jetistik ekeni seziledi, - dedi Indıra Nurlan Jibek Joly telearnasyndaǵy «Bugin LIVE» baǵdarlamasynda sóılegen sózinde.
Kásipkerdiń aıtýynsha, kompanııa úsh jyl qatarynan «Qazaqstannyń úzdik taýary» baıqaýyna qatysyp keledi. Osy ýaqyt ishinde óndiris óńirlik deńgeıden asyp, búginde Qazaqstannyń barlyq aımaǵyna shań men gaz tazartý, jeldetý jáne suıyqtyqty súzý júıelerine arnalǵan ónerkásiptik súzgilerdi jetkizedi. Tsement óndirisi, energetıka, metallýrgııa, hımııa jáne tamaq ónerkásibi sııaqty salalarda kómegi zor. Aqmola oblysy, Býrabaı aýdanynda ornalasqan zaýytta shamamen 50 adam eńbek etedi, olardyń basym bóligi – jastar. Kásiporyn jylyna shamamen 150 myń óndiristik fıltr shyǵarady jáne ónimdi Ózbekstan men Qyrǵyzstanǵa eksporttaıdy.
Ol óńirlik keńeıý josparlaryna toqtalyp, óndiris vertıkaldy ıntegratsııaǵa bet burǵanyn aıtady. Onyń ishinde fıltrge qajetti shıkizatty óz elimizde jasaý múmkindigin qarastyryp jatyr.
– Biz fıltrdi ǵana emes, shıkizatqa deıingi kezeńdi ıgerýge tyrysýdamyz. Bul tehnologııa negizinen Eýropada damyǵan, Qytaıda da bar. Aldaǵy osyndaı óndiristi óz elimizde qalyptastyrý oıymyzda bar, - deıdi ol.
Kásiporyn basshysy jastardy sheteldik kompanııalarda tájirıbeden ótkizýge basymdyq beretinin, al basty maqsat – otandyq óndiristiń básekege qabiletin arttyrý ekenin atap ótti.
Aıta keteıik, buǵan deıin Memleket basshysy Qasym-Jomart Toqaev úzdik kásiporyndardy túrli nomınatsııalar boıynsha marapattaǵanyn jazǵan edik.