Óndiristegi jazataıym oqıǵalardy tergeý protsesi tolyq avtomattandyryldy
ASTANA. KAZINFORM – Aqparattar júıesin ıntegratsııalaý arqyly kásiporyndarda bolǵan tótenshe jaǵdaılardy tergeý barysy tolyq avtomattandyryldy.
- «Eńbek qaýipsizdigi jáne eńbekti qorǵaý» avtomattandyrylǵan aqparattyq júıesinde eńbek ınspektorlarynyń jeke kabıneti bar. Ol jerde eńbek qatynasyna qatysty tekserýlerdi tirkeý jáne olardyń nátıjesin resimdeý jáne nusqama berý júzege asyrylady. Óndiristegi jazataıym oqıǵalardy tergeý protsesi tolyq avtomattandyrylǵan. HR Enbek portalynyń «Eńbek qaýipsizdigi jáne eńbekti qorǵaý» avtomattandyrylǵan aqparat júıesimen ıntegratsııalandy. Bul jumys berýshilerge jazataıym oqıǵalar týraly málimetterdi, habarlamalardy, komıssııa quramy men N-1 aktisin joldaýǵa múmkindik beredi, - dedi Eńbek jáne halyqty áleýmettik qorǵaý mınıstrligi memlekettik eńbek ınspektsııasy komıtetiniń tóraǵasy Meırambek Ahmetov ortalyq kommýnıkatsııalar qyzmeti alańynda ótken baspasóz máslıhatynda.
Komıtet basshysynyń aıtýynsha, atalǵan jańashyldyq aqparattardy óńdeý merzimin qysqaryp, derekterdiń dáldigin arttyrýǵa múmkindik beredi.
- Búginde elimizdegi 13,7 myń iri jáne orta kásiporynnyń ujymdyq sharttary tsıfrlandyrylǵan. Eńbek ınspektorlarynyń jedel esep berý mindeti 15-ten 5-ke deıin qysqartylyp, olar avtomattandyryldy, - deıdi mınıstrlik ókili.
Aıta ketsek, jyl basynan beri eńbek qaýipsizdigin saqtamaǵan jumys berýshilerge 428 mln teńgeden astam aıyppul salyndy.
Sondaı-aq eńbek ınspektorlary jumysshylar aldynda jalaqy bereshegi kóp óńirlerdi anyqtaǵan.