Óndiristegi jazataıym oqıǵa: elimizde qansha jumysker mindetti saqtandyrýmen qamtylǵan
ASTANA. KAZINFORM – Eńbek jáne halyqty áleýmettik qorǵaý mınıstrligi jumyskerlerdiń áleýmettik qorǵalýyn kúsheıtýge jáne eńbek qaýipsizdigi júıesin jetildirýge baǵyttalǵan memlekettik saıasatty júıeli túrde iske asyrýdy jalǵastyryp jatqanyn habarlady.
Osy baǵyttaǵy negizgi tetikterdiń biri – jumyskerlerdi eńbek (qyzmettik) mindetterin atqarý kezinde jazataıym oqıǵalardan mindetti saqtandyrý júıesi. Bul júıe Qazaqstan Respýblıkasynyń zańnamasynda kózdelgen jaǵdaılarda jumyskerler men olardyń otbasy músheleriniń saqtandyrý arqyly qorǵalýyn qamtamasyz etedi.
Búginde mindetti saqtandyrýmen 4 mıllıonǵa jýyq jumysker qamtylǵan. Mindetti saqtandyrý sharttaryn 119 myńnan astam zańdy tulǵa jasasqan. Bul eldegi jumys istep turǵan kásiporyndardyń shamamen 70%-y.
Aı saıyn 5 myńnan astam jumys berýshi mindetti saqtandyrý shartyn rásimdeıdi. 2026 jyldyń sońyna deıin osyndaı sharttar jasasqan jumys berýshilerdiń sanyn 130 myńǵa deıin jetkizý josparlanyp otyr.
Jumyskerlerdi jazataıym oqıǵalardan mindetti saqtandyrý – eńbek adamynyń áleýmettik qorǵalýyn qamtamasyz etetin memlekettik kepildikterdiń biri. Jumysker eńbek mindetterin oryndaý barysynda ómiri men densaýlyǵyna zııan kelgen jaǵdaıda, zańnamaǵa sáıkes joǵaltqan tabysyn óteý, emdelýge, medıtsınalyq jáne kásiptik ońaltýǵa jumsalǵan shyǵyndardy óteý, sondaı-aq zańda kózdelgen ózge de tólemder qarastyrylǵan.
Eńbek jáne halyqty áleýmettik qorǵaý mınıstrliginiń málimetinshe, jumyskerlerdiń saqtandyrý arqyly qorǵalýyn qamtamasyz etý qaýipsiz ári ornyqty eńbek qatynastarynyń mańyzdy quramdas bóligi bolyp sanalady. Mindetti saqtandyrýmen qamtýdy keńeıtýmen qatar óndiristik jaraqattanýdyń aldyn alýǵa baǵyttalǵan keshendi jumystar da júrgizilip jatyr.
Osy maqsatta eńbek qaýipsizdigi jáne eńbekti qorǵaý salasyndaǵy zańnama jetildirilip, óndiristik táýekelderdi tsıfrlyq monıtorıngteý quraldary engizilip jatyr. Sonymen qatar kásiporyndarda óndiristik jaraqattanýdyń aldyn alý sharalary kúsheıtilip, jumys berýshilermen jáne eńbek qaýipsizdigi salasynyń mamandarymen ózara yntymaqtastyq keńeıtilip jatyr.
– Mınıstrlik jumyskerlerdiń áleýmettik qorǵalýyn kúsheıtýmen qatar, óndiristegi táýekelderdiń aldyn alýǵa basymdyq beredi. Osy maqsatta qaýipsiz eńbek mádenıetin qalyptastyrý, saqtandyrý júıesiniń qamtý aıasyn keńeıtý jáne eńbek qaýipsizdigin qamtamasyz etý jónindegi keshendi sharalar turaqty túrde júzege asyrylyp jatyr. Bul óz kezeginde jumyskerlerdiń ómiri men densaýlyǵyn saqtaýǵa baǵyttalǵan, – dep málimdedi QR Eńbek jáne halyqty áleýmettik qorǵaý mınıstrliginde.
Mınıstrlik jumyskerlerdi mindetti saqtandyrýmen qamtý aıasyn keńeıtý, eńbek qaýipsizdigi júıesin odan ári jetildirý jáne óndiristik jaraqattanýdyń aldyn alý baǵytyndaǵy keshendi jumysty jalǵastyrady. Bul azamattardyń áleýmettik qorǵalý deńgeıin arttyrýǵa jáne kásiporyndarda qaýipsiz eńbek ortasyn qalyptastyrýǵa yqpal etedi.
Jumys berýshi Eńbek sharttaryn esepke alý júıesine qandaı málimet engizýge mindetti ekenin jazǵan edik.
