Óndiristegi jaraqat úshin kásiporyn basshylary jeke jaýap beredi — Premer-Mınıstr
ASTANA. KAZINFORM – Qazaqstanda iri kásiporyn basshylarynyń jumysy óndiristik jaraqat deńgeıi boıynsha baǵalanatyn bolady. Premer-Mınıstr Oljas Bektenov eńbek qaýipsizdigine qatysty KPI engizýdi usynyp, onyń oryndalýy basshylardyń jalaqysy men qyzmette qalýyna tikeleı áser etýi kerektigin aıtty.
Memleket basshysy sáýir aıynda Qaýipsiz eńbek jaǵdaılaryn jetildirý jáne jumyskerlerdiń eńbek quqyqtaryn qorǵaý máseleleri týraly Zańǵa qol qoıdy. Eńbek zańnamasyndaǵy qoldanystaǵy normalar da jańartylyp jatyr.
– Endi jumys berýshiler kásiporyndarda eńbek qaýipsizdigin odan ári qamtamasyz etý úshin tıisti sharalardy qabyldaýy qajet. Eńbek mınıstrligi óndiristik jaraqat alý kórsetkishi boıynsha barlyq iri kásiporyndardyń basshylary úshin KPI engizýi qajet. Onyń oryndalmaı qalýy basshylyqtyń jalaqysyna jáne jalpy jumysta qalýyna tikeleı áser etýge tıis, – dedi O.Bektenov Úkimettiń búgingi otyrysynda.
Qaýipsizdikke, avtomattandyrýǵa jáne tsıfrlandyrýǵa salynǵan ınvestıtsııalardyń qaıtarymy da, ádette birneshe ese joǵary. Álemdegi eń ozyq ónerkásiptik kompanııalar osy qaǵıdatty myqtap ustanady.
– Degenmen elimizdiń jekelegen kásiporyndaryndaǵy ónerkásiptik qaýipsizdiktiń qazirgi deńgeıinde táýekelder bar. Olardyń deni tozyǵy jetken jabdyqtardy ýaqytyly almastyrmaý, óndiristik baqylaýdyń álsizdigi jáne zamanaýı qaýipsizdik júıeleriniń bolmaýyna baılanysty týyndap otyr. Bul, eń aldymen, taý-ken, munaı-gaz jáne hımııa kásiporyndaryna baılanysty. Ónerkásiptiń osy salalaryn erekshe baqylaýda ustaǵan jón, – dedi Úkimet basshysy.
Aıta keteıik, búgin Úkimet jumys ornyndaǵy qaýipsizdik máselesin qarastyrdy.
Endi Qazaqstanda qaýipti óndiristik nysandardy JI baqylaıdy. Bul úshin «e-TJM» biryńǵaı tsıfrlyq platformasy ázirlenip jatyr.
