Óndiristegi adamdardyń ólimi áli de azaımaı otyr – Senat tóraǵasy
ASTANA. KAZINFORM – Tótenshe oqıǵalardyń 44 paıyzy Qaraǵandy, Ulytaý jáne Shyǵys Qazaqstan oblystaryna tıesili. Bul týraly Senat tóraǵasy Máýlen Áshimbaev málim etti.
- Eńbek naryǵyn damytýdyń 2029 jylǵa deıingi tujyrymdamasynda sapaly jumys oryndaryn qurýǵa basymdyq berilgen. Bul turaqty jumyspen qamtýdy, laıyqty jalaqyny, áleýmettik qoldaýdy jáne qaýipsiz eńbek jaǵdaılaryn qamtıdy. Osy baǵyttarda aldaǵy ýaqytta kóptegen jumys atqarylýy qajet. Sonymen qatar, árbir jumys orny ónimdi bolýy kerek ekenin de umytpaǵanymyz abzal. Alaıda, 2023 jyly Qazaqstanda eńbek ónimdiligi shamamen 25 myń dollardy nemese saǵatyna shamamen 13 dollardy qurady. Salystyrý úshin Ekonomıkalyq yntymaqtastyq jáne damý uıymyna múshe elderde bul kórsetkish saǵatyna shamamen 67 dollar ekenin atap ótken jón. Demek, osy elderdegi jumyskerlerdiń ónimdiligi bizden bes ese artyq degendi osy tsıfrlar kórsetedi, - dedi M.Áshimbaev Senattaǵy «Eńbek adamy – ulttyq ekonomıkanyń ósýi men el órkendeýiniń negizi» taqyrybyna arnalǵan parlamenttik tyńdaýda.
Onyń aıtýynsha, óndiris tıimdiligi artpaı, jalaqynyń jaı ósýi uzaqmerzimdi ekonomıkalyq tıimdilikti qamtamasyz etpeıdi. Jumysshylar tabysynyń turaqty ósýine jaǵdaı jasaıtyn óndiristik kórsetkishterdi jaqsartýǵa da basa mán bergen jón. Sonyń ishinde zamanaýı tehnologııalardy engizý jáne tsıfrlandyrýdyń mańyzy zor.
- Osy saladaǵy mańyzdy mindetterdiń taǵy biri – óndiristegi qaýipsizdikti qamtamasyz etý. Ókinishke qaraı, elimizde óndiristegi adamdardyń jaraqattanýy men ólimi áli de azaımaı otyr. Jaqynda Ulytaý oblysyndaǵy «Jomart» kenishinde bolǵan qaıǵyly jaǵdaı soǵan dálel. 2021-2023 jyldary jazataıym oqıǵalardyń sany aıtarlyqtaı artqan. Olardyń 80 paıyzdan astamy iri jáne orta ónerkásip oryndarynda bolǵan. Tótenshe oqıǵalardyń 44 paıyzy Qaraǵandy, Ulytaý jáne Shyǵys Qazaqstan oblystaryna tıesili. Desek te, qazirgi tańda barlyq qajetti zańnamalyq baza bar. Tıisti zańdardy depýtattar ýaqtyly qabyldap keledi. Byltyr memlekettik eńbek ınspektsııasy Eńbek jáne halyqty áleýmettik qorǵaý mınıstrliginiń qurylymyna aýystyryldy. Osy rette, zańnamalardyń oryndalýyn baqylaýdy kúsheıtý, aldyn alý sharalaryn keńeıtý jáne jumys berýshilerdiń jaýapkershiligin arttyrý asa mańyzdy ekenin atap ótken jón. Bul baǵytta bıznes, eńbek ınspektsııasy jáne ónerkásiptik qaýipsizdik basqarmalary tarapynan belsendi jumys júrgizilýge tıis dep esepteımiz, - dedi Senat tóraǵasy.
Budan buryn habarlanǵandaı, M.Áshimbaev Qazaqstanǵa tehnıkalyq jáne kásiptik bilimi bar 900 myńǵa jýyq maman qajet ekenin aıtty.