Óndiriste bar kináni jumysshyǵa jabýǵa jol berilmeıdi – Aımaǵambetov

ASTANA. KAZINFORM — Óndiriste zardap shekken jumysshyny qorǵaýdyń jańa tetigi engizildi. Bul týraly Májilistiń jalpy otyrysynda jumysshylardyń quqyqtaryn qorǵaýǵa arnalǵan zań jobasyn birinshi oqylymda talqylaý kezinde depýtat Ashat Aımaǵambetov málim etti.

- Bar kináni jumysshyǵa jabý problemasy kezdesip jatady. Másele nede? Ashyǵyn aıtý kerek, oqıǵa bolsa, komıssııa kóbine bar kináni jumysshynyń ózine aýdara salýǵa tyrysady. «Ózi kináli, qaýipsizdik tehnıkasyn saqtamady» dep, kinániń 50%, tipti 70 paıyzyn jumysshynyń ózine jaba salady. Osynyń saldarynan densaýlyǵynan aıyrylǵan jumysshy tıesili ótemaqysynan da qaǵylady. Sondyqtan biz mynandaı usynys berdik: qyzmetkerdiń «óreskel abaısyzdyǵy» anyqtalǵan kúnniń ózinde, onyń jaýapkershiligin 25 paıyzdan asyrylmaıdy, - dedi A. Aımaǵambetov.

Onyń paıymynsha, bul norma zardap shekken qyzmetkerdi qorǵaý úshin óte mańyzdy. Sonymen qatar, bul norma jumys berýshini jaýapkershilikten qashpaı, qaýipsiz eńbek jaǵdaıyn jasaýǵa yntalandyrady.

Buǵan deıin habarlanǵandaı, Májilistiń jalpy otyrysynda kóptegen jumys berýshiler áleýmettik kepildikterden jaltaryp júrgeni aıtyldy.