Óndiristi jańǵyrtýǵa arnalǵan «Órleý-lızıng» baǵdarlamasy iske qosyldy
ASTANA. KAZINFORM — Jańa qural shaǵyn jáne orta bıznestiń jeńil lızıng alýyna múmkindik jasap, óndiris qýatyn arttyrýǵa serpin beredi, dep habarlaıdy «Damý» kásipkerlikti damytý qorynyń» baspasóz qyzmeti.
QR Úkimetiniń tapsyrmasyn oryndaý maqsatynda óńdeý ónerkásibindegi shaǵyn jáne orta bıznes kásiporyndaryn jańǵyrtý, tehnıka men jabdyqtaryn qaıta jańartýǵa arnalǵan «Órleý-lızıng» atty jańa baǵdarlama iske qosyldy.
— Baǵdarlama aıasynda kásipkerler 10 jumys kúnine deıingi merzim ishinde qosymsha kepilsiz zamanaýı jabdyqtar satyp ala alady. Osylaısha, kásiporyndar básekege qabiletti bola túsip, tozǵan materıaldyq-tehnıkalyq baza máselesin sheshedi, — delingen habarlamada.
Baǵdarlama sharttary:
- Maksımal soma: bir qaryz alýshyǵa 300 mln teńgege deıin;
- Merzimi: 3-ten 5 jylǵa deıin;
- Mólsherlemesi: jylyna ózgerissiz 12,6%;
- Maqsaty: jańa jabdyq alýǵa;
- Avans tólem: lızıng múlki qunynyń 10%-y;
Lızıng alý úshin kásiporyn jumys istep turǵan ShOB sýbektisi bolýy, óndiris qýaty bar jáne naryqta keminde 1 jyl jumys isteýi kerek. Sondaı-aq, kásiporynnyń ótken jylǵy aınalymy satyp almaq bolǵan jabdyq qunynan kem degende bir jarym ese asýy kerek degen de shart bar.
Jabdyqty otandyq zaýyttan nemese ónim shyǵarýshy zaýyttyń resmı dıstrıbıýtorynan/dılerinen kem degende bir jyl merzimge, kepildik jáne servıstik qyzmetimen birge satyp alýǵa bolady.
Jańa baǵdarlamany júzege asyrý maqsatynda «Damý» Qory men «KazLeasing» — Qazaqstannyń lızıngtik kompanııalar qaýymdastyǵy arasynda memorandýmǵa qol qoıyldy.
Onyń aıasynda baǵdarlamanyń sharttary men talaptaryna sáıkes lızıngtik kompanııalarǵa qarjy bólinedi. Seriktester tizimi jańartylyp, Qordyń damu.kz resmı saıtyna salynyp turady.
Áleýmettik-ekonomıkalyq nátıjege qol jetkizý maqsatynda baǵdarlamanyń kásipkerlerge de artatyn mindettemeleri bar. Bul — memleketten qoldaý alý kezindegi standart ári negizdelgen tájirıbe. Qarjy memlekettik resýrstan jeńildikpen beriletindikten, kásipkerlerden ekonomıkany damytýǵa jáne jańa jumys oryndaryn jasaýǵa úles qosýy kútiledi.
Budan buryn 2026 jyldyń 1 naýryzynan bastap Qazaqstanda arnaıy salyq rejımderiniń jańa tártibi kúshine enetinin jazǵan edik. Endi kásipkerler men ózin-ózi jumyspen qamtyǵan azamattar úsh rejımniń birin tańdaýy kerek.