Óndiristi jańǵyrtqan kásiporyndarǵa memleketten 145,5 mln teńge ótemaqy berildi
ASTANA. KAZINFORM — Memleket jarty jylda bıznestiń 145,5 mln teńge kólemindegi shyǵyndaryn ótedi. Bul týraly «QazIndustry» qazaqstandyq ındýstrııa jáne eksport ortalyǵynyń memlekettik yntalandyrý sharalary dırektsııasy habarlady.
Memleket eńbek ónimdiligin arttyrý jáne otandyq ónimderdi ishki naryqta ilgeriletý maqsatynda qazaqstandyq bıznesti qoldaýdy jalǵastyryp jatyr. Bıylǵy birinshi jartyjyldyqta qazaqstandyq kásiporyndardyń shamamen 145,5 mln teńge kóleminde shyǵyny óteldi.
— Qarajattyń basym bóligi, ıaǵnı shamamen 144 mln teńgesi eńbek ónimdiligin arttyrýǵa jumsalǵan shyǵyndardy óteýge baǵyttaldy. Bul — tehnologııalyq úderisterdi jetildirýge, tehnologııalyq jabdyqtardy satyp alýǵa, qyzmetkerlerdiń kásibı quzyretterin arttyrýǵa, óndiristi uıymdastyrýdyń tıimdiligin arttyrýǵa jáne tsıfrlyq tehnologııalardy engizýge jumsalǵan shyǵyndar, — delingen dırektsııa taratqan aqparatta.
Atalǵan baǵyt aıasynda mashına jasaý, jeńil ónerkásip, agroónerkásiptik keshen salalaryndaǵy kásiporyndar, sondaı-aq qurylys materıaldaryn, plastmassa jáne rezeńke buıymdaryn óndirýshiler qoldaý kórdi.
Sondaı-aq bıznestiń halyqaralyq sertıfıkattaýǵa, ónimderdi zerthanalyq synaqtan ótkizýge, mindetti tańbalaýǵa arnalǵan jabdyqty (onyń ishinde aıaq kıim ónerkásibine arnalǵan baǵdarlamalyq qamtamasyz etýdi) satyp alýǵa jumsaǵan shyǵyndary da óteledi.
Eske sala keteıik, QazIndustry bıznes sýbektileri shyǵyndarynyń 40%-dan 50%-ǵa deıingi bóligin óteıdi. Ótken jyly QR Ónerkásip jáne qurylys mınıstrligi ónerkásipti memlekettik yntalandyrý tetikterin keńeıtti. Mysaly, endi otandyq kásiporyndar basymdyqty taýarlardy el ishinde temirjol kóligimen tasymaldaǵany úshin jumsaǵan shyǵyndarynyń jartysyna ótemaqy alady. Budan bólek, halyqaralyq sertıfıkattaýǵa jumsalatyn shyǵyndardy óteý mólsheri 5 esege artty.
Osyǵan deıin Aıda Balaeva Qazaqstandaǵy bıznes sýbektileriniń jartysyna jýyǵyn áıelder basqaratynyn aıtty.
