Óndiriske qajetti ımporttyq taýarlar tizimi keńeıtilýi múmkin
ASTANA. KAZINFORM — UEM otandyq óndiris úshin ımporttalatyn taýarlardyń tizimin jańartýdy josparlap otyr.
QR Ulttyq ekonomıka mınıstrligi otandyq kásiporyndardyń qajettilikteri úshin ımporttalatyn shıkizat tizbesin keńeıtetin túzetýler ázirledi, ıaǵnı ımportqa QQS tóleýdi kezinde keıinge qaldyrý beriledi. Ózgerister eldiń óńdeý jáne hımııa ónerkásibin qoldaýǵa baǵyttalǵan.
— Buıryq jobasy qazaqstandyq ónimdi, onyń ishinde pestıtsıdterdi shyǵarý úshin qajetti shıkizat pen komponentterdiń qosymsha pozıtsııalarynyń tizimine engizýdi kózdeıdi. Sonymen qatar, UEM osy sharaǵa quqyǵy bar salyq tóleýshilerdiń tizimin ózektendiredi. Bul rette óndirisi el ishinde tolyǵymen jolǵa qoıylǵan taýarlardy qoldanystaǵy tizbelerden alyp tastaý josparlanǵan, — delingen habarlamada.
Túzetýler «Eýrazııalyq ekonomıkalyq odaqqa múshe memleketterdiń aýmaǵynan ımporttalatyn, qaıta óńdeýge arnalǵan taýarlardy qospaǵanda, Qazaqstan Respýblıkasynyń aýmaǵyna ónim óndirý maqsatynda ımporttalatyn taýarlardyń, sondaı-aq osyndaı taýarlardy ımporttaıtyn Qazaqstan Respýblıkasy salyq tóleýshileriniń tizbelerin bekitý týraly» QR Premer-Mınıstriniń orynbasary — Ulttyq ekonomıka mınıstriniń 2025 jylǵy 28 qarashadaǵy № 126 buıryǵyna engiziledi.
Jobany qabyldaý qaıta óńdeý jáne hımııa ónerkásibi kásiporyndaryn memlekettik qoldaý tetikterin jetildirýge, sondaı-aq qoldanystaǵy taýarlar men salyq tóleýshilerdiń tizbeleriniń ózektiligin qamtamasyz etýge múmkindik beredi.
Qujattyń jobasy «Ashyq NQA» portalynda jarııa talqylaý úshin ornalastyryldy. Talqylaý 2026 jylǵy 2 shildege deıin júrgiziledi.
Buǵan deıin Qazaqstan shetelderden qyzanaq ımportyn ýaqytsha shekteıtinin jazǵan edik.
