Óndiris pen bilimge basymdyq: Pavlodarda Joldaýdyń óńirge berer múmkindigi talqylandy
ASTANA. KAZINFORM — Pavlodarda Prezıdent Joldaýynda aıtylǵan ónerkásip pen adamı kapıtaldy damytý mindetteri talqylandy, dep habarlaıdy Quryltaıdyń baspasóz qyzmeti.
Quryltaı depýtattary Jarqynbek Amantaı men Ilıa Terenchenko, Qazaqstan Halyq Keńesiniń múshesi Vera Kım, Eńbek jáne halyqty áleýmettik qorǵaý vıtse-mınıstri Eldar Kúzenbaev, Energetıka vıtse-mınıstri Baqytjan Іlııas Prezıdenttiń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyndaǵy basymdyqtaryn talqylaý úshin Pavlodar óńiriniń turǵyndarymen kezdesti.
Toraıǵyrov Ýnıversıtetiniń stýdentteri jáne oqytýshylarymen, sondaı-aq «Qazaqstan alıýmınııi» AQ-nyń eńbek ujymymen mazmundy áńgime órbidi.
Qatysýshylar adamı kapıtaldy damytý, bilim berý, bilikti kadrlar daıarlaý, eńbek ónimdiligin arttyrý, ónerkásipti jańǵyrtý, energetıka salasyn damytý, halyqty áleýmettik qorǵaý jáne zamanaýı tehnologııalardy engizý máselelerine erekshe nazar aýdardy.
— Árbir azamattyń Prezıdent Joldaýyn iske asyrýda ózi úshin týyndaǵan múmkindikterdi kóre bilýi mańyzdy. Qurylys salasyn damytý jańa nysandar salýdy ǵana emes, sonymen qatar kásiporyndardyń, jumys oryndarynyń, bıznes úshin múmkindikterdiń paıda bolýyn bildiredi. Tehnıkalyq bilim alatyn jastardyń aldynda erekshe perspektıvalar ashylady, — dedi Ilıa Terenchenko.
Stýdentterge aldaǵy jyldary bilikti mamandarǵa degen suranys arta túsetini, al kásibı daǵdylar men quzyretter tabysty jumysqa ornalasýdyń mańyzdy sharty bolatynyn aıtyldy. Kezdesýlerde elimizdiń turaqty damýyn qamtamasyz etýdegi joǵary oqý oryndarynyń róli atap ótildi.
Memleket basshysynyń alǵa qoıǵan mindetterin júzege asyrý memlekettik organdardyń, bilim berý mekemeleriniń, bıznes pen azamattyq qoǵamnyń birlesip jumys atqarýyn talap etetini sóz boldy.
Ýnıversıtet stýdentteri men oqytýshylary qonaqtarǵa ózekti suraqtar qoıýǵa múmkindik aldy. Jas mamandardy jumysqa ornalastyrý perspektıvalary, tehnıkalyq mamandyqtarǵa suranys, qurylys pen energetıka salalaryn damytý, sondaı-aq elimizdiń áleýmettik saıasatyndaǵy alda bolatyn ózgerister jaıynda áńgime órbidi.
Toraıǵyrov Ýnıversıtetiniń tórtinshi kýrs stýdenti Saıat Ergeshbaev Joldaýda jastar úshin basty máseleler, sonyń ishinde bilim berý sapasyn, kásibı damýdy jáne ózin-ózi júzege asyrý múmkindikterin keńeıtý qamtylǵanyn atap ótti.
«Qazaqstan alıýmınııi» AQ eńbek ujymynyń ókili, áleýmettik máseleler jónindegi menedjer Nursultan Esembaev ta óz pikirin ortaǵa saldy. Ol ónerkásipti damytý, óndiristi jańǵyrtý jáne halyqtyń ál-aýqatyn arttyrý máseleleriniń mańyzdylyǵyna nazar aýdardy.
— Prezıdent «Qýatty qalalar qýatty aımaqtardyń, al qýatty aımaqtar kúshti memlekettiń negizin qalaıdy» degen bolatyn. Men úshin bul, birinshi kezekte — ınfraqurylymnyń damýy. Al Jalpyhalyqtyq aýqymdy qurylys jylynyń jarııalanýy — ınfraqurylymnyń damyp, barshamyzdyń ıaǵnı, Qazaqstan azamattarynyń jalpy ál-aýqaty da kóterilýi tıis ekenin bildiredi, — dedi ol.
Aldaǵy ýaqytta óndiristerdiń jańǵyratynyna «Qazaqstan elektrolız zaýyty» AQ jóndeý jáne synaqtan ótkizý ınjeneri Áıgerim Temirbaeva da nazar aýdardy.
— Men osy zaýytta tórt jyldan beri jumys isteımin. Aınalamyzdaǵy oń ózgeristerge úles qosyp, jumysshylardyń kúndelikti qalaı jumys isteıtinin kórip júrmin. Memleket basshysynyń Joldaýyndaǵy otandyq ónerkásipti damytý, óndiristi jańǵyrtý jáne zamanaýı tehnologııalardy engizý jónindegi bastamalardy erekshe qoldaımyn. Meniń oıymsha, bul eldiń bolashaǵy úshin asa mańyzdy baǵyttar, — dedi Áıgerim Temirbaeva.
Ekibastuz ben Aqsýda da osyndaı kezdesýler ótip, Quryltaı depýtattary, Qazaqstan Halyq Keńesi músheleri jáne ortalyq memlekettik organdardyń ókilderi turǵyndarmen jáne eńbek ujymdarymen Joldaýdyń negizgi erejelerin jan-jaqty talqylady.
Buǵan deıin Beıjińde Qazaqstan Prezıdentiniń Joldaýy talqylanǵanyn jazdyq.