Óndirýshiler bıtýmdy deldaldarǵa ǵana ótkizedi - senator

ASTANA. QazAqparat – Jergilikti avtojoldardy jóndeý sapasy nashar baqylanady, josparlaý tıisti taldaýsyz júrgiziledi jáne «qaldyq qaǵıdaty» boıynsha qarjylandyrylady. Senator Serik Shaıdarov óziniń depýtattyq saýalynda joldar men eldi mekenderdegi kósheler jaı-kúıiniń negizgi problemalaryn alǵa tartty, dep habarlaıdy QazAqparat tilshisi.

Depýtat jergilikti joldardyń teńgerimdi damýy men kútip ustalýyn qamtamasyz etý úshin ortaq paıdalanýdaǵy barlyq joldardy basqarý boıynsha biryńǵaı ákimshilik qurý, sondaı-aq jol qurylysy úshin jergilikti materıaldardy belsendi paıdalaný qajet ekenine senimdi.

«Elimizde joldardy salý jáne jóndeý úshin barlyq qajetti materıaldar bar. Alaıda, otandyq óndiristiń áleýeti tolyq paıdalanylmaı otyr. Jaz kezinde shamamen 500 000 tonna kóleminde bıtým tapshylyǵy baıqalady. Qurylys maýsymynyń qyzǵan shaǵynda bıtýmnyń baǵasy úsh ese artady. Óndirýshiler bıtýmdy deldaldarǵa ótkizedi. Dızel otynynyń baǵasynan da osyǵan uqsas jaǵdaı baıqalyp otyr», - dedi Serik Shaıdarov Senattyń jalpy otyrysynda.

Senator usynystarynyń ishinde deldaldarǵa tosqaýyl qoıý, zaýyttardyń merdigerlermen tikeleı sharttar jasasý jónindegi mindettemeleri, qajet bolǵan jaǵdaıda sharttardy túzetý rásimderin jedeldetý, sondaı-aq smetalyq qujattamaǵa baqylaýdy kúsheıtý sekildi qadamdar bar.

«Sońǵy jyldary «Aýyl – el besigi» baǵdarlamasy aıasynda eldi mekenderdiń kóshelerin jóndeýge qomaqty qarjy bólinip jatyr. Bólingen qarajat negizinen ortasha jóndeý jumystaryn qarjylandyrýǵa baǵyttalady, degenmen onyń sapasy nashar. Sebebi, smetalyq qujattama memlekettik saraptamadan da, vedomstvolyq saraptamadan da ótpeıdi. Eldi mekenderdiń kóshelerin jóndeýge mindetti vedomstvolyq saraptama engizý qajet», - dedi senator.