Óndiristik tájirıbeden ótken aqmolalyq stýdentter 1,5 mln. teńgeden astam tabys tapqan
KÓKShETAÝ. QazAqparat - Aqmola oblysynyń stýdentteri óndiristik tájirıbe arqyly 1,5 mıllıon teńgeden astam tabys tapqan, dep habarlaıdy QazAqparat tilshisi.
Dýaldy júıe boıynsha oqytylyp jatqan Esil qalasyndaǵy №7 agrotehnıkalyq kolledj stýdentteri teorııalyq bilimderin óndiris oryndarynda tájirıbemen ushtastyrýda. Stýdentter 2016 jyly óndiristik tájirıbe arqyly 1,5 mıllıon teńgeden astam tabys tapqan.
2015 jyly atalmysh kolledj stýdentteri dýaldy júıe boıynsha «tamaqtandyrýdy uıymdastyrý» mamandyǵyna oqytylýda. 2016 jyly Aqmola oblysynyń kásipkerler palatasyynda (kolledj-óndiris-stýdent arasynda) úshjaqty 39 kelisim shart jasaldy.
Sonymen qatar, jyl saıyn kóktemgi jáne kúzgi dala jumystary kezinde aýyl sharýashylyǵy taýarlaryn óndirýshiler «Fermerlik sharýashylyq», «Dánekerleý isi» mamandyqtary boıynsha bilim alyp jatqan kolledj stýdentterin kásibı tájirıbeden ótkizýge alady.
«Stýdentterimizdiń tájirıbeden ótýi úshin óndiris oryndarymen kelisim bar. Osy kelisim negizinde sýdentterdiń kóktemgi jáne kúzgi dala jumystary kezinde tájirıbeden ótýi úshin qolaıly etip, oqý kestesin jasadyq», dedi №7 agrotehnıkalyq kolledjiniń orynbasary Natalıa Boıko.
Bilim ordasymen belsendi jumys istep otyrǵan «Shańyrak R» JShS, «Orlovka» JShS, «Moskovskoe» JShS, «Agro-Oldıvı» JShS, «Qarakól» AShK jáne «Aıgúl» sharýa qojalyǵy óndiris oryndary bar.
