Óndiristik obektilerdi eńbek jaǵdaılary boıynsha mindetti merzimdik attestattaý qaǵıdalary bekitildi - Úkimet qaýlysy

Qazaqstan Respýblıkasy Úkimetiniń qaýlysy

2011 jylǵy 5 jeltoqsan №1457 Astana, Úkimet Úıi

Óndiristik obektilerdi eńbek jaǵdaılary boıynsha mindetti merzimdik attestattaý qaǵıdalaryn bekitý týraly

 Qazaqstan Respýblıkasynyń 2007 jylǵy 15 mamyrdaǵy Eńbek kodeksiniń 15-babynyń 24) tarmaqshasyna sáıkes Qazaqstan Respýblıkasynyń Úkimeti qaýly etedi:

1. Qosa berilip otyrǵan Óndiristik obektilerdi eńbek jaǵdaılary boıynsha mindetti merzimdik attestattaý qaǵıdalary bekitilsin.

2. Osy qaýly alǵashqy resmı jarııalanǵan kúninen bastap kúntizbelik on kún ótken soń qoldanysqa engiziledi.

                                                                         Qazaqstan Respýblıkasynyń Premer-Mınıstri K.MÁSІMOV.

Qazaqstan Respýblıkasy

 Úkimetiniń

 2011 jylǵy «5» jeltoqsandaǵy

 №1457 qaýlysymen

 bekitilgen

Óndiristik obektilerdi eńbek jaǵdaılary boıynsha

mindetti merzimdik attestatsııalaý qaǵıdalary

 1. Jalpy erejeler

1. Osy Óndiristik obektilerdi eńbek jaǵdaılary boıynsha mindetti merzimdik attestatsııalaý qaǵıdalary (budan ári - Qaǵıdalar) Qazaqstan Respýblıkasynyń 2007 jylǵy 15 mamyrdaǵy Eńbek kodeksiniń 15-babynyń 24) tarmaqshasyna sáıkes ázirlendi jáne óndiristik obektilerdi eńbek jaǵdaılary boıynsha attestattaý tártibin aıqyndaıdy.

2. Osy Qaǵıdalarda mynadaı uǵymdar paıdalanylady:

1) óndiristik obektilerdi eńbek jaǵdaılary boıynsha attestattaý -olarda oryndalatyn jumystyń qaýipsizdigi, zııandylyǵy, aýyrlyǵy, qaýyrttyǵy, eńbek gıgıenasynyń jaı-kúıin baǵalaý jáne óndiristik orta jaǵdaılarynyń eńbek qaýipsizdigi jáne eńbekti qorǵaý salasyndaǵy normatıvterge sáıkestigin aıqyndaý maqsatynda óndiristik obektilerdi, tsehtardy, ýchaskelerdi, jumys oryndaryn baǵalaý jónindegi qyzmet;

2) zerthanalar - óndiristik orta faktorlaryn zerthanalyq jáne aspaptyq zertteýlermen jáne óndiristik orta jaǵdaılarynyń eńbek qaýipsizdigi jáne eńbekti qorǵaý salasyndaǵy normatıvterge sáıkestigin aıqyndaýǵa baılanysty qyzmetti júzege asyratyn zerthanalar;

3) óndiristik obektiler - ónim shyǵarýmen jáne jasaýmen, paıdaly qazbalardy ıgerýmen, óndirýmen jáne qaıta óńdeýmen, qurylyspen jáne óndiristik qyzmettiń basqa da túrlerimen aınalysatyn uıymnyń tsehtary, ýchaskeleri jáne ózge de jeke turǵan óndiristik bólimsheleri;

4) jumys orny - eńbek qyzmeti protsesinde óziniń eńbek mindetterin oryndaý kezinde qyzmetkerdiń turaqty nemese ýaqytsha bolatyn orny;

5) mamandandyrylǵan uıymdar - jumys berýshiler zerthanalyq jáne aspapty zertteýler júrgizý úshin tartatyn bilikti kadrlary men óziniń quramynda zerthanalary nemese zańnamada belgilengen tártippen tekserýden ótkizilgen tıisti ólsheý quraldary bar nemese qyzmettiń osyndaı túrlerin júzege asyrýshy zerthanalarmen uzaq merzimdi sharttary bar derbes (táýelsiz) uıymdar;

6) bilikti kadrlar - mamandandyrylǵan uıymdardyń óndiristik obektilerdi eńbek jaǵdaılary boıynsha attestattaý jónindegi jumyspen aınalysatyq, tıisti bilimi bar nemese daıyndyq kýrstarynan ótken jáne tıisti sertıfıkaty bar qyzmetkerleri;

7) sertıfıkat - tıisti bilim berý uıymdary eńbek qaýipsizdigi jáne eńbekti qorǵaý máseleleri boıynsha daıarlyq kýrsynan ótken adamdarǵa beretin belgilengen úlgidegi qujat;

8) jeke qorǵaný quraldary - qyzmetkerdi zııandy jáne (nemese) qaýipti óndiristik faktorlardyń áserinen qorǵaýǵa arnalǵan quraldar, onyń ishinde arnaıy kıim;

9) ujymdyq qorǵaný quraldary - eki nemese odan da kóp jumys isteýshilerdi zııandy jáne (nemese) qaýipti óndiristik faktorlardyń áserinen bir mezgilde qorǵaýǵa arnalǵan tehnıkalyq quraldar;

10) jaraqat qaýipsizdigi - óndiristik obektilerdiń eńbekti qorǵaý jónindegi normatıvtik quqyqtyq aktilerde belgilengen jaǵdaılarda jumys isteýshilerdiń jaraqattanýyn boldyrmaıtyn eńbek qaýipsizdigi talaptaryna sáıkestigi;

11) eńbektiń aýyrlyǵy - eńbek protsesiniń aǵzanyń negizinen tirek- qozǵalys apparatyna jáne fýnktsıonaldyq (júrek-qan tamyrlary, tynys alý jáne basqa) júıesine túsetin júktemeni kórsetetin, onyń qyzmetin qamtamasyz etetin sıpattamasy;

12) eńbek qaýipsizdigi jaǵdaılary - eńbek protsesi men óndiristik ortanyń qyzmetker eńbek mindetterin atqarýy kezinde eńbek qaýipsizdigi men eńbekti qorǵaý talaptaryna sáıkes bolýy;

13) eńbek qaýyrttylyǵy - eńbek protsesiniń qyzmetkerdiń negizinen ortalyq júıke júıesine, sezý organdaryna, emotsıonaldyq júıesine túsetin júktemeni kórsetetin sıpattamasy;

14) qaýipsizdik normalary - óndiris jaǵdaılaryn, óndiristik jáne eńbek protsesin uıymdyq, tehnıkalyq, sanıtarlyq-gıgıenalyq, bıologııalyq jáne eńbek qyzmeti protsesinde qyzmetkerdiń ómiri men densaýlyǵyn saqtaýǵa baǵyttalǵan ózge de normalardy, qaǵıdalardy, rásimder men ólshemderdi qamtamasyz etý turǵysynan sıpattaıtyn sapalyq jáne sandyq kórsetkishter.

3. Óndiristik obektilerdi eńbek jaǵdaılary boıynsha attestattaýdy jumys berýshi júrgizedi.

Jumys berýshiniń óndiristik obektilerdi eńbek jaǵdaılary boıynsha attestattaýǵa arnalǵan jeke zerthanasy bolmaǵan jaǵdaıda zerthanalyq jáne aspaptyq zertteý júrgizý úshin mamandandyrylǵan uıymdar tartylady nemese jeke zerthanalardyń qyzmeti paıdalanylady.

4. Óndiristik obektilerdi attestattaý:

1) uıymnyń óndiristik obektileri eńbek qaýipsizdigi jáne eńbekti qorǵaý salasyndaǵy qoldanylyp júrgen normatıvterge sáıkes attestattaýdy;

2) uıymnyń óndiristik obektileriniń eńbek qaýipsizdigi jáne eńbekti qorǵaý salasyndaǵy qoldanylyp júrgen normatıvterge sáıkestigin keshendi baǵalaýdy:

eńbek zııandylyǵynyń jáne qaýiptiliginiń dárejesin baǵalaýdy;

jaraqat qaýipsizdiginiń dárejesin jáne ujymdyq qorǵaný quraldarymen qamtamasyz etilýin baǵalaýdy;

qyzmetkerlerdiń jeke qorǵaný quraldarymen qamsyzdandyrylýyn baǵalaýdy qamtıdy.

5. Óndiristik obektilerdi attestattaý nátıjeleri:

1) óndiristik obektilerdi qoldanystaǵy normatıvtik quqyqtyq aktilerdiń talaptarymen sáıkestikke keltirý úshin eńbek jaǵdaılary men qaýipsizdigin jaqsartý jónindegi uıymdyq-tehnıkalyq is-sharalar keshenin júrgizý;

2) óndiristik orta men jumys oryndaryndaǵy qaýipsizdik jaǵdaılarynyń naqty jaı-kúıin baǵalaý;

3) qyzmetkerlerdiń qajetti jeke jáne ujymdyq qorǵaný quraldarymen qamtamasyz etilýin, olardyń naqty eńbek jaǵdaılaryna jáne olarǵa qoıylatyn standart talaptaryna sáıkestigin aıqyndaý;

4) kásiptik aýrýǵa kúdik týǵanda jáne kásiptik aýrýdyń dıagnozyn aıqyndaǵan kezde, onyń ishinde daýlar men ózge de kelispeýshilikterdi sot tártibimen sheshken kezde aýrýdyń kásippen jáne oryndaıtyn jumysymen baılanysyn aıqyndaý úshin zııandy nemese qaýipti eńbek jaǵdaılaryndaǵy jumys faktisin rastaý;

5) óndiristik obektiniń nemese jabdyqtyń paıdalanylýyn toqtatý (toqtata turý) týraly sheshim qabyldaý, sondaı-aq tehnologııany ózgertý;

6) eńbek jaǵdaılarynyń jaı-kúıi týraly statıstıkalyq eseptilikti jasaý;

7) eńbek (qyzmettik) mindetterin atqarý kezinde qyzmetkerdiń ómiri men densaýlyǵyna zııan keltirgeni úshin jumys berýshiniń jaýapkershiligin saqtandyrǵan kezde saqtandyrýshynyń (jumys berýshiniń) saqtandyrý tarıfin belgileý;

8) eńbek jaǵdaılary zııandy jáne qaýipti jumystarda isteıtin qyzmetkerlerge eńbekaqy tóleýdi jáne Qazaqstan Respýblıkasynyń eńbek zańnamasynda kózdelgen jeńildikter men kepildikter berýdi negizdeý;

9) qyzmetkerlerdiń eńbek jaǵdaılary, eńbek qaýipsizdigi jáne eńbekti qorǵaýdyń jaı-kúıi, zııandy óndiristik faktorlar jáne olardyń áserinen qorǵaný sharalary týraly shynaıy aqparat alý maqsatynda paıdalanylady.

6. Qazaqstan Respýblıkasynyń aýmaǵynda jumys isteıtin barlyq uıymdardyń óndiristik obektileri attestattaýǵa jatady.

7. Attestattaýdy ótkizý merzimin uıym, eńbek jaǵdaılarynyń ózgerýine oraı, biraq óndiristik obektilerdiń sońǵy attestattaýdan ótkizilgen sátten bastap 5 jylda keminde bir ret belgileıdi.

8. Óndiristik obektilerdi kezekten tys attestattaý qaıta qurylǵan, jańǵyrtylǵan, jańa tehnıka nemese tehnologııa ornalastyrylǵan jaǵdaılarda júrgiziledi.

Kezekten tys attestattaý nátıjeleri óndiris obektisine eńbek jaǵdaılary boıynsha aldyndaǵy attestattaý materıaldaryna qosymsha túrinde resimdeledi.

9. Eńbek jónindegi ýákiletti memlekettik organ mamandandyrylǵan uıymdar týraly aqparatty (ataýy, zańdy mekenjaıy, baılanys telefony, bilikti kadrlary týraly málimet, zerthanalardyń bolýy nemese qyzmettiń osyndaı túrlerin júzege asyrýshy zerthanalarmen sharttarynyń bolýy) ınternet-resýrsta ornalastyrady.

2. Jumys berýshiniń attestattaýdy ótkizýge daıyndyǵy

10. Óndiristik obektini attestattaýdy júrgizýdi uıymdastyrý úshin jumys berýshi turaqty jumys isteıtin, quramynda tóraǵa, músheler jáne óndiristik obektilerdi attestattaý jónindegi qujattamany jasaýǵa, júrgizýge jáne saqtaýǵa jaýapty hatshy bar attestattaý komıssııasyn qurý týraly tıisti buıryq shyǵarady.

11. Uıymnyń attestattaý komıssııasynyń quramyna jetekshi ne onyń orynbasary, eńbek qaýipsizdigi jáne eńbekti qorǵaý qyzmetteriniń jáne ózge de bólimsheleriniń mamandary kelisim boıynsha, sondaı-aq uıym qyzmetkerleriniń ókilderi kiredi.

12. Uıymnyń attestattaý komıssııasy:

1) oryndaıtyn jumystary men eńbek jaǵdaılarynyń sıpattamasy boıynsha uqsas jumys oryndaryn bóle otyryp, attestattaýǵa jatatyn óndiristik obektilerdiń tolyq tizbesin jasaıdy;

2) óndiristik ortanyń, eńbek jáne tehnologııalyq protsesterdiń sıpattamalaryna, qoldanylatyn jabdyqtar men tetikterdiń, shıkizat pen materıaldardyń túrlerine qaraı zertteýge (zerthanalyq jáne aspaptyq zertteýler men baǵalaýǵa) jatatyn qaýipti jáne zııandy faktorlardyń tolyq tizbesin jasaıdy;

3) eńbek jaǵdaılary boıynsha attestattaýdy ótkizýge óziniń múmkindikteri bolmaǵan jaǵdaıda mamandandyrylǵan uıymdy nemese zerthanalardy belgileıdi jáne onymen tıisti shart jasasý jóninde jumys berýshige usynys engizedi;

4) uıymnyń óndiristik obektilerin attestattaýdy ótkizý kestesin jasaıdy jáne ony jumys berýshige bekitýge usynady;

5) óndiristik obektilerdi eńbek jaǵdaılary boıynsha attestattaý nátıjelerin avtomatty túrde óńdeý úshin tsehtarǵa, ýchaskelerge, jumys oryndaryna kodtar beredi;

6) óndiristik obektilerdi attestattaýdy ótkizý úshin qajetti normatıvtik anyqtamalyq bazany qalyptastyrady;

7) óndiristik jaraqattaný men kásiptik aýrýlardyń sebepterin taldaıdy;

8) óndiristik jaraqattanýdy taldaý negizinde jaraqattaný qaýpi basym jumystardy, jumys oryndarynyń ýchaskelerin, tehnologııalardy, mashınalardy, mehanızmderdi, stanoktar men jabdyqtardy aıqyndaıdy;

9) attestattaý jónindegi jumystar kólemin eskere otyryp, tartylatyn mamandandyrylǵan uıymmen jáne jumys berýshimen óndiristik obektilerdi attestattaýdan ótkizý merzimin kelisedi;

10) uıymdardyń óndiristik obektilerdi attestattaýdy ótkizýdiń sapasyna uıymdarda ishki baqylaýdy júzege asyrady.

 3. Attestattaýdy ótkizýdiń tártibi

13. Eńbek jaǵdaılary boıynsha baǵalaýǵa jumys ornyndaǵy barlyq qaýipti jáne zııandy óndiristik (fızıkalyq, hımııalyq, bıologııalyq, tehnologııalyq) faktorlar, onyń ishinde eńbek aýyrlyǵy men qaýyrttylyǵy jatady.

Qaýipti jáne zııandy óndiristik faktorlardyń deńgeıleri zerthanalyq jáne aspaptyq ólsheýler negizinde anyqtalady. Fızıkalyq, hımııalyq, bıologııalyq jáne psıhofızıologııalyq faktorlardyń zerthanalyq jáne aspaptyq ólsheýleri jáne ergonomıkalyq zertteýler ujymdyq jáne jeke qorǵaný quraldary jaramdy bolǵan kezde jumys jaǵdaıynda jáne óndiristik protsesterde oryndalýǵa tıis. Jumysshylardyń únemi ashyq aýada jáne jerasty kómir shahtalarynda bolýyna baılanysty jumys oryndarynda zerthanalyq jáne aspaptyq ólsheýler júrgizilmeıdi.

Qaýipti jáne zııandy óndiristik faktorlardyń parametrlerin ólsheý, eńbek protsesiniń aýyrlyǵy men eńbek qaýyrttylyǵy kórsetkishterin aıqyndaý, óndiristegi eńbek gıgıenasy Qazaqstan Respýblıkasynyń Úkimeti bekitken sanıtarlyq qaǵıdalarda, gıgıenalyq normatıvterde kózdelgen tártippen jáne kólemde júzege asyrylady. Zerthanalyq jáne aspaptyq zertteýler nátıjeleri hattamalarmen resimdeledi (osy Qaǵıdalarǵa 1-qosymsha).

Zııandy jáne qaýipti óndiristik faktorlardyń parametrlerin ólshegen kezde belgilengen merzimge sáıkes memlekettik tekserýden ótken ólsheý quraldaryn paıdalaný qajet.

Eńbek jaǵdaılarynyń naqty jaı-kúıin baǵalaýdy qaýipti jáne zııandy óndiristik faktorlardyń shekti ruqsat etilgen kontsentratsııalaryna (deńgeıine) sáıkestigine ólshengen parametrler sáıkestigi negizinde attestattaý komıssııasy júrgizedi.

14. Jaraqat qaýipsizdigin baǵalaýdyń negizgi obektileri:

1) óndiristik jabdyqtar;

2) qurylǵylar men qural-saımandar;

3) ujymdyq qorǵaný quraldarymen qamtamasyz etilý;

4) oqý jáne nusqaý quraldarymen qamtylý bolyp tabylady.

15. Óndiristik jabdyqtyń, qurylǵylar men qural-saımandardyń jaraqat qaýipsizdigin baǵalaý eńbek qaýipsizdigi jáne eńbekti qorǵaý jónindegi qoldanystaǵy normatıvtik tehnıkalyq qujattar, memlekettik standarttar, qaǵıdalar men nusqaýlyqtar negizinde júrgiziledi jáne olardyń tehnıkalyq jaǵdaıyna, pasport parametrleri men óndiristik protsess tehnologııasynyń talaptaryna sáıkestigine baılanysty bolady.

Tehnıkalyq pasporttar men sertıfıkattar bolmaǵan kezde óndiristik jabdyqtardyń normatıvtik qaýipsizdik talaptaryna sáıkestigi naqty osy jabdyqta qoldanylatyn konstrýktsııalyq qaýipsizdik elementteri kórsetilgen jabdyq birlikteriniń árqaısysyna sáıkestik aktisimen (budan ári - sáıkestik aktisi) rastalady.

Sáıkestik aktisin jumys berýshi qurǵan komıssııa jasaıdy.

Jabdyqtardyń jekelegen túrlerine tehnıkalyq pasporttar, sertıfıkattar nemese aktiler bolmaǵan kezde olardyń tehnıkalyq jaǵdaıyna qaramastan, jaraqat qaýipsizdigine teris baǵa beriledi jáne olardy paıdalanýdy toqtata turý qajettiligi týraly másele qaralady.

16. Óndiristik jabdyqtyń, qurylǵylar men qural-saımandardyń jaraqat qaýipsizdigin, ujymdyq qorǵaný quraldarymen qamtamasyz etilýin, sondaı-aq oqý men nusqaý quraldarymen qamtylýdy baǵalaý Jaraqat qaýipsizdigin baǵalaý hattamasymen (osy Qaǵıdalarǵa 2-qosymsha) resimdeledi.

17. Qyzmetkerlerdiń jeke qorǵaný quraldarymen qamtamasyz etilýin baǵalaý:

Ár kásip qyzmetkerlerdiń jeke qorǵaný quraldarymen (budan ári - JQQ) qamtamasyz etilýi anyqtalady. Qyzmetkerlerdiń JQQ-men qamtamasyz etilýin baǵalaý naqty berilgen quraldardy óndiristik ortanyń zııandy faktorlaryn eskere otyryp, qyzmetkerlerge arnaıy kıim, arnaıy aıaq kıim jáne basqa jeke qorǵaný quraldaryn jumys berýshiniń qarajaty esebinen berýdiń normalarymen salystyrý arqyly anyqtalady.

Qyzmetkerlerdiń JQQ-men qamtamasyz etilýin baǵalaý kezinde berilgen JQQ-nyń naqty eńbek jaǵdaılaryna sáıkestigin baǵalaý júrgiziledi. JQQ-nyń sapasy sáıkestik sertıfıkattarymen rastalýǵa tıis.

JQQ-nyń sapasyn jáne olarmen qyzmetkerlerdiń qamtamasyz etilýin baǵalaý Qyzmetkerlerdiń JQQ-men qamtamasyz etilýin baǵalaý hattamasymen (osy Qaǵıdalarǵa 3-qosymsha) resimdeledi. Qyzmetkerler eńbek normalary men jaǵdaılaryna sáıkes JQQ-men tolyq qamtamasyz etilgende ǵana «qamtamasyz etildi» degen baǵa qoıylady.

 4. Jumys oryndarynda eńbek jaǵdaılaryn baǵalaý

 18. Jumys oryndarynda eńbek jaǵdaılarynyń jaı-kúıin baǵalaý:

1) óndiristik ortanyń zııandylyǵy men qaýiptiliginiń, eńbek protsesiniń aýyrlyǵy men qaýyrttylyǵynyń dárejesinen;

2) jaraqat qaýipsizdiginiń jáne ujymdyq qorǵaný quraldarymen qamtamasyz etilý dárejesinen;

3) jeke qorǵaný quraldarymen qamtamasyz etilýden, olardyń sapasy jáne eńbek jaǵdaılaryna sáıkestiliginen turady.

19. Jumys oryndarynda qaýipti jáne zııandy óndiristik faktorlar bolmaǵanda nemese olardyń naqty mánderi qaýipsizdik normalaryna sáıkes bolǵanda, sondaı-aq jaraqat qaýipsizdiginiń talaptary oryndalǵanda jáne qyzmetkerler JQQ-men qamtamasyz etilgende, jumys oryndarynda eńbek qaýipsizdigi jaǵdaılary eńbek qaýipsizdigi talaptaryna sáıkes keledi dep esepteledi.

20. Jumys oryndary tómendegi faktorlardyń biri:

1) óndiristik orta faktorlarynyń naqty máni qoldanystaǵy normalardan joǵary bolǵan;

2) jaraqat qaýipsizdiginiń talaptary saqtalmaǵan;

3) qyzmetkerlerdiń JQQ-men qamtamasyz etilýi qoldanystaǵy normalarǵa sáıkes kelmegen jaǵdaılarda eńbek qaýipsizdigi jaǵdaılary belgilengen talaptaryna sáıkes emes bolyp esepteledi.

21. Eńbek jaǵdaılary zııandy jáne qaýipti faktorlarǵa jatqyzylǵan kezde attestattaý komıssııasy jumys ornyn qaıta jaraqtandyrý nemese taratý jóninde sharalar qabyldaý týraly usynys engizedi.

22. Óndiristik obektilerdi attestattaýdy attestattaý komıssııasy Uıymdaǵy eńbek jaǵdaıyn jaqsartý jáne saýyqtyrý jónindegi jospardyń jobasyn (budan ári - Jospar jobasy) jáne atestattaý nátıjesin qosa otyryp, óndiristik obektini attestatsııalaý aktisimen resimdeıdi.

23. Jospar jobasynda eskirgen tehnıka men jabdyqty aýystyrý, óndiristik protsess tehnologııasyn jetildirý, eńbek jaǵdaılaryna sáıkes keletin jeke jáne ujymdyq qorǵaný quraldaryn qoldaný jóninde is-sharalar, saýyqtyrý is-sharalary jáne eńbek qaýipsizdigi jáne eńbekti qorǵaýdy uıymdastyrý jónindegi is-sharalar kózdelýge tıis (osy Qaǵıdalarǵa 4-qosymsha).

24. Jospar jobasynda barlyq jumys oryndaryn eńbek qaýipsizdigi jáne eńbekti qorǵaý talaptaryna sáıkes keltirý kózdelýge tıis.

25. Jospar jobasynda attestattaý komıssııasynyń tóraǵasy men músheleri qol qoıady.

 5. Óndiristik obektilerdi attestattaýdy resimdeýdiń tártibi

26. Attestattaý nátıjeleri:

1) jalpy málimetterdi (uıymnyń tolyq zańdy ataýy, mekenjaıy, uıymnyń uıymdyq-quqyqtyq nysany, jumys isteıtinderdiń jalpy sanyn, onyń ishinde zııandy jáne qaýipti eńbek jaǵdaılarynda jumys isteıtinderdi kórsete otyryp jáne jeke óndiristik bólimsheler boıynsha uıymnyń qurylymy, attestattaý júrgizýdiń negizi, tartylatyn mamandandyrylǵan uıymdar týraly málimetter, attestattaý komıssııasynyń quramy);

2) óndiristiń qysqasha tehnologııasyn (óndiris qyzmetiniń sıpaty, qoldanylatyn tehnologııalar, barlyq zııandy, qaýipti óndiristik faktorlardyń, qaýipti óndiristik jabdyqtardyń jáne protsesterdiń tizbesi);

3) jumys oryndaryndaǵy eńbek jaǵdaılarynyń zerthanalyq, aspaptyq jáne ergonomıkalyq zertteýler hattamalary;

4) jaraqat qaýipsizdigin baǵalaý hattamalary;

5) qyzmetkerlerdiń JQQ-men qamtamasyz etilýin baǵalaý hattamalaryn qamtıtyn qujat túrinde resimdeledi.

Óndiristik obektilerdi eńbek jaǵdaılary boıynsha mindetti merzimdik attestattaý qaǵıdalarynyń qosymshasy resmı BAQ-tarda jarııalandy.