Óndiristik nysanda apattardy tergep-tekserýdiń biryńǵaı tártibi belgilenedi
«Ónerkásiptik qaýipsizdik salasyndaǵy jumystardy júrgizý quqyǵyna attestatsııalanǵan uıymdardyń jáne apattyq-qutqarý jumystaryn júrgizý jónindegi qyzmetterdi usynatyn uıymdardyń qyzmetin retteý úshin zań jobasynda osy uıymdarǵa prafılaktıkalyq qadaǵalaýdy júzege asyrý jáne ony júrgizý tártibin belgileý kózdeledi. Munan basqa qaýipti óndiristik nysandarda taý-ken qutqarý, gazdan qutqarý, burqaqqa qarsy jumystardy júrgizý sııaqty ónerkásiptik qaýipsizdik salasyndaǵy kásibı apattyq-qutqarý qyzmetiniń negizgi belgilerin reglamentteý jáne olarǵa qoıylatyn talaptardy belgileý usynylady», - dedi Májiliste «Qazaqstan Respýblıkasynyń keıbir zańnamalyq aktilerine ónerkásip qaýipsizdigi máseleleri jónindegi ózgerister men tolyqtyrýlar engizý týraly» zań jobasyn tanystyrǵan vıtse-mınıstr.
Erjan Amanııazovtyń aıtýynsha, quqyqtyq bos keńistikti joıý úshin zań jobasymen qaýipti óndiristik nysandarynda jumys júrgizýdiń erekshelikteri men ózgesheligin egjeı-tegjeıli kórsetetin normatıvtik-quqyqtyq aktiler ázirleý jáne bekitý jónindegi ónerkásiptik qaýipsizdik salasyndaǵy ýákiletti organǵa quzyret berý kózdeledi. Bul ónerkásiptik qaýipsizdik deńgeıin edáýir arttyrady.
«Qaýipti óndiristik nysanda apattar men oqys oqıǵalardy tergep-tekserýdi júrgizýdiń biryńǵaı tártibin belgileý úshin apattar men oqys oqıǵalardy tergep-tekserý jónindegi komıssııanyń ókilettikterin, olardy qurý tártibin, tergep-tekserýler júrgizilgennen keıin uıymdardyń nátıjeleri men is-qımyldaryn resimdeýdi naqtylaý usynylady», - dedi E.Amanııazov.
Vıtse-mınıstrdiń atap ótýinshe, zań jobasy ónerkásiptik qaýipsizdik salasynda memlekettik qadaǵalaýdy júzege asyrý kezinde sybaılas jemqorlyq táýekelderin azaıtýǵa jáne quqyqtyq olqylyqtar men kollızııalardy joıýǵa baǵyttalǵan.
«Zań jobasy qabyldanǵan jaǵdaıda mynadaı oń quqyqtyq jáne áleýmettik-ekonomıkalyq saldarlar boljanady: qaýipti óndiristik faktorlardyń zııandy áserinen azamattardyń qorǵalý deńgeıin arttyrý; qaýipti óndiristik obektilerdegi jaraqattaný deńgeıin tómendetý; apat nátıjesinde úshinshi tulǵalarǵa zııan keltirý yqtımaldyǵyn tómendetý. Bul túzetýler qaýipti óndiristik nysnadarda ónerkásiptik qaýipsizdikti qamtamasyz etý júıesiniń tıimdiligin arttyrýǵa múmkindik beredi. Zań jobasy qabyldanǵan jaǵdaıda teris quqyqtyq jáne áleýmettik-ekonomıkalyq saldarlar boljanbaıdy. Osy zań jobasyn qabyldaý memlekettik bıýdjet qarajatynan qosymsha qarjylyq shyǵyndarǵa ákelmeıdi», - dedi Erjan Amanııazov.