Óndiristik kásiporyn men ǵylymı zertteý uıymdary arasynda qarym-qatynastyń tıimdi mehanızmin qurý kerek - Baqytjan Jumaǵulov

; ALMATY. Maýsymnyń 17-si. QazAqparat /Názıra Eleýhan/ - Ǵylymı ınjenerlik birlestikterdiń aldynda jańa mindetter tur. Elimizdiń ǵalymdary men ınjenerlerdiń belsendi jáne maqsattalǵan jumystary, óndiristegi tehnologııalardy ǵylymnyń aldyńǵy qatarly jetistigimen jaraqtandyrý ekonomıka jańarýyndaǵy sheshýshi faktorlardyń biri bolatynyna senimdimin.

Bul Elbasy N.Á.Nazarbaevtiń el aldynda qoıyp otyrǵan strategııalyq mindetterdi tıimdi sheshýge yqpal etedi. Bul týraly búgin Almatyda "Halyq tutynatyn taýarlardyń ınnovatsııalyq tehnologııasy, sapasy jáne qaýipsizdigi" degen taqyrypta ótken halyqaralyq ǵylymı - tájirıbelik konferentsııada Qazaq Ulttyq ýnıversıtetiniń rektory, QR UǴA akademıgi Baqytjan Jumaǵulov aıtty, dep habarlaıdy QazAqparat.

«Búgingi konferentsııa Qazaqstandaǵy tamaq jáne jeńil ónerkásip salasyndaǵy damýdyń ózekti jáne perspektıvti mindetteri men halyq tutynatyn taýarlardyń sapasy men qaýipsizdigindegi máselelerge arnalyp otyr. Osy baǵyttar Qazaqstanda tıimdi damýy úshin, óndiristik kásiporyn men ǵylymı zertteý uıymdary arasynda qarym-qatynastyń tıimdi mehanızmin qurý kerek. Elimizde mundaı baılanystyń negizi jasalynýda, olar - tamaq ónerkásibi salasy men toqyma ónerkásibinde jumys istep jatqan klasterler jáne halyq tutynatyn taýarlardy sertıfıkattan ótkizetin jáne taldama jasaýǵa arnalǵan quraldar men zamanaýı qural-jabdyqtarmen jaraqtalǵan JOO-ǵy ǵylymı ınjenerlik zerthanalar», dedi Baqytjan Jumaǵulov. Onyń aıtýynsha, elimizdegi tamaq jáne jeńil ónerkásip salasynyń damýy - ekonomıkany dıversıfıkatsııalaýdyń, Qazaqstannyń ındýstrııaldy-ınnovatsııalyq damýynyń mańyzdy quramy bolyp tabylady.