Óndiristik alpınızm jumystar men mamandyqtardyń biryńǵaı tarıftik biliktilik kitapshasyna engiziletin bolady - Bas prokýratýra
ASTANA. Qarashanyń 26-sy. QazAqparat /Aıdar Ospanalıev/ - Úkimet Bas prokýratýranyń óndiristik alpınızm salasy boıynsha eńbek qaýipsizdigin normatıvti-quqyqtyq retteý jónindegi usynysyn qoldady.
Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
Onyń aıtýynsha, aǵymdaǵy jyldyń tamyz aıynda Almaty qalasyndaǵy «Almaty taýers» bıznes ortalyǵynda 4 birdeı óndiris alpınısi mert bolǵan. Azamattardyń qaıǵyly qazaǵa ushyraýyna osy saladaǵy eńbek qaýipsizdigin retteıtin normatıvti aktilerdiń bolmaýy da sebep bolyp otyr. «Osyǵan qaraı, Úkimet basshysynyń aıtýynsha, jaqyn arada Tótenshe jaǵdaılar mınıstrligi joǵary bıiktikte júrgiziletin óndiristik jumystardyń qaýipsizdigine baılanysty qoıylatyn talaptardyń tizimin bekitpek. Al Qurylys jáne turǵyn úı - kommýnaldyq sharýashylyǵy agenttigi Eńbek jáne halyqty áleýmettik qorǵaý mınıstrligimen birlese otyryp, 2010 jyly bıik ǵımarattar turǵyzý men olardy paıdalaný barysyndaǵy tehnıkalyq qaýipsizdik jónindegi halyqaralyq standarttarmen sáıkestendirilgen normalar men erejelerdi daıyndaıtyn bolady», dedi resmı ókil.
Onyń aıtýynsha, óndiristik alpınızm jumystar men mamandyqtardyń biryńǵaı tarıftik biliktilik kitapshasyna engiziletin bolady.
