Óndiristerde jumysshylardyń ólim-jitim sany artýda - Eńbek mınıstrligi
ASTANA. QazAqparat - Óndiristerde jumysshylardyń ólim-jitim sany artýda. Bul týraly búgin Ortalyq kommýnıkatsııalar qyzmetinde QR Eńbek jáne halyqty áleýmettik qorǵaý mınıstrligi Baqylaý jáne áleýmettik qorǵaý komıtetiniń tóraǵasy Aqmadı Ádilov málim etti.
«Anyqtalǵan zań buzýshylyqtardyń 40 paıyzy eńbek qaýipsizdigin qamtamasyz etýge qatysty bolyp otyr. Óndiristerde bolatyn eńbek jaraqaty men oqys oqıǵalardyń sany ótken jylmen salystyrǵanda 5 paıyzǵa kemigenine qaramastan, adam shyǵyny oryn alatyn oqıǵalar birshama ósken. Shamamen 20 paıyzǵa deıin joǵarylap otyr», - deıdi ol.
Aqmadı Ádilovtiń aıtýynsha, olar negizinen óndiristik aımaqtarda, Shyǵys Qazaqstan, Qaraǵandy jáne Aqtóbe oblystarynda oryn alýda.
«Osy máselege qatysty tıisti jumystar jasalýda. Máselen, bir óndiriste shamamen 600-ge tarta jumysshy eńbek qaýipsizdigi jasalmaıynsha, jumys oryndaryna shyǵarylmaıtyn bolady. Sonymen qatar 48 óndiristik nysannyń jumysy toqtatylǵan. 800 is tıisti organdarǵa baǵyttalyp, 50-den astam qylmystyq is qozǵaldy», - dep atap ótti departament basshysy.
