Óndiristegi jazataıym oqıǵanyń 70 paıyzdan astamy jumys berýshiniń kinásinen - Dáýlet Arǵandyqov

ASTANA. QazAqparat - Óndiristegi jazataıym oqıǵanyń 70 paıyzdan astamy jumys berýshiniń kinásinen bolady. Bul týraly búgin QR Parlamenti Májilisi Áleýmettik-mádenı damý komıteti men «Nur Otan» partııasy Fraktsııasynyń janyndaǵy Óńirlik saıasat jáne máslıhattarmen jumys jónindegi keńesiniń keńeıtilgen birikken otyrysynda QR Densaýlyq saqtaý jáne áleýmettik damý vıtse-mınıstri Dáýlet Arǵandyqov málim etti.

«Óndiristik jaraqattaný oqıǵalaryna jasalǵan taldaý derekterine qaraǵanda, jyl saıyn óndiristerde eki myńnan astam qaıǵyly oqıǵaǵa jol beriledi. Onyń ishinde 300-ge jýyǵy adamnyń ólimimen aıaqtalady. Sonymen birge jazataıym oqıǵalardyń 70 paıyzdan astamy jumys berýshilerdiń kinásinen oryn alady. 2014 jyly keıbir kásiporyndarda adam ólimimen aıaqtalǵan eki jáne odan da kóp oqıǵa tirkeldi», - dedi mınıstrdiń orynbasary.

D. Arǵandyqovtyń sózinshe, Qaraǵandy oblysyndaǵy «Qazaqmys» korporatsııasynda 6 adam mert bolsa, «ArselorMıttal Temırtaý» AQ-da - 3 adam, «Qazhrom» TUK» AQ-da 4 adam, «BI GROUP» AQ fılıalynyń nysandarynda 8 adam qaza boldy.

Óndiristik jaraqat alýdyń joǵary deńgeıi Qaraǵandy, Shyǵys Qazaqstan jáne Qostanaı oblystarynda tirkeldi. Ekonomıka salalary boıynsha zardap shekkenderdiń eń kóp úlesi qurylys, taý-ken-metallýrgııalyq kásiporyndarda baıqaldy. Bul salalardyń úlesine barlyq óndiristik jaraqattaný oqıǵalarynyń 40 paıyzǵa jýyǵy tıesili.