Óndiris jáne tutyný qaldyqtaryn keshendi basqarýǵa arnalǵan «Jasyl damý ortalyǵy» qurylady
A. Qarashanyń 16-sy. QazAqparat /Qanat Mámetqazyuly/ ‑Elimizde óndiris jáne tutyný qaldyqtaryn basqaratyn «Jasyl damý ortalyǵy» qurylatyn bolady. Bul týraly búgin QR Parlamenti Májilisinde ótken Úkimet saǵatynda QR Qorshaǵan ortany qorǵaý mınıstri Nurǵalı Áshimov málim etti,
dep habarlaıdy QazAqparat.
Mınıstrdiń aıtýynsha, Memleket basshysynyń júktegen tapsyrmasy negizinde aǵymdaǵy jyly «2010-2020 jyldarǵa arnalǵan Qazaqstan ekologııasy» atty baǵdarlama ázirlengen. Osy baǵdarlama sheńberinde «Jasyl damý ortalyǵyn» qurý kózdelýde. Ortalyq halyqaralyq tájirıbe negizinde qurylatyn sekildi. Mınıstrdiń aıtýyna qaraǵanda, dál osyndaı ortalyqtar Frantsııada, Ońtústik Koreıada, Germanııada jumys isteıdi eken.
«Ortalyq óz qyzmeti barysynda, eń bastysy óndiris jáne tutyný qaldyqtaryn meılinshe joıý nemese kádege jaratýǵa qatysty mindetterdi atqarady. Bul rette, tarıhı lastanýlardy joıý, tehnogendik mıneraldyq túzilimder kadastryn qurý men ınvestıtsııa tartý sharalary qamtylady. Turmystyq qoqys pen aǵyndy sý kárizderin tazartý, ónerkásiptik gazdardy tazartý boıynsha aldyńǵy qatarly tehnologııalardy endirý máseleleri de atqarylatyn bolady. Budan basqa Stokgolm konventsııasy boıynsha júkteletin halyqaralyq mindettemeler de osy ortalyq sheńberinde júzege asady», dedi N. Áshimov. Onyń aıtýynsha, aldaǵy ýaqytta «Jasyl damý ortalyǵy» elimizde qoqys óńdeý zaýyttaryn salýǵa qatysty jumystardy atqaratyn bolady. «Biz birqatar qalalarda qoqys óńdeıtin zaýyttardy qyrýar qarjyǵa sheteldikterge salǵyzyp jatyrmyz. Al mamandardyń saraptamasy boıynsha, bundaı zaýyttardy ózimizde jasaýǵa bolady, oǵan shamamyz da múmkindigimiz de jetedi. Sondyqtan aldaǵy ýaqytta «Jasyl damý ortalyǵy» osyndaı zaýyttardy salý jobasymen aınalysady», dedi mınıstr.
