Óndiris oshaqtary tarıfti xalyqtan eki ese tómen baǵamen tóleýi tıis - Rodostovets
ASTANA. QazAqparat - Qazaqstannyń taý-ken jáne taý-metallýrgııa kásiporyndary qaýymdastyǵynyń basshysy Nıkolaı Rodostovetstiń aıtýynsha, búginde óndiristik oshaqtarǵa túsetin salmaq kóp. Zaýyttar xalyqqa jumys pen jalaqy berýden bólek, kommýnaldyq tarıfterdi eki, tipti bes ese qymbat baǵamen tóleýge májbúr, dep habarlaıdy QazAqparat tilshisi.
«Taý-ken salasyndaǵy álemdik baǵalardyń qalaı ózgerip jatqanyn bárimiz jaqsy bilemiz. Alaıda tarıfterdiń salmaǵy azaıatyn emes. Máselen, sońǵy bes jyldyń ishinde «KEGOC» jelileri boıynsha tarıfter eki ese ósse, REK boıynsha bes esege qymbattady. Búginde álem boıynsha óndiris oshaqtary elektr energııasy úshin xalyqtan eki ese tómen tarıfpen tóleıdi. Jylý men gaz da solaı. Sebebi sonyń barlyǵy kóterme baǵamen jetkiziledi. Kezinde Prezıdent te elektr energııasy men jylý boıynsha tarıfterdi teńestirý qajettigi jaıynda aıtqan edi. Alaıda bizde Qaraǵandy men Aqtóbe sııaqty óndiristik aımaqtarda iri kásiporyndar qýat kózderi úshin eki ese artyq baǵany tóleıdi. Zaýyttarǵa úsh ese qymbatqa túsedi. Al keıbir oblystarda óndirister sýdyń bir tekshe metri úshin bes ese artyq baǵany tóleýge májbúr», - dedi Rodostovets búgin Astanada ótip jatqan VIII Halyqaralyq taý-ken metallýrgııa kongresinde.
Onyń aıtýynsha, jergilikti ákimder óz jumysyn jeńildetý úshin barlyq shyǵyndardy óndiristik oshaqtarǵa júkteı salǵan.
«Alaıda bir nárseni túsinip alý qajet, xalyqqa jumys pen jalaqy berip otyrǵan - óndiristik oshaqtar. Olardyń shyǵyndary az emes. Sondyqtan tarıftik saıasatty ózgertý kerek», - dep atap kórsetti uıym basshysy.
Aıta keteıik, kongress kezinde «ArselorMıttal Temirtaý» AQ bas dırektory Paramjıt Kalon kenshilerdiń zeınet jasyn kemitýdi usyndy.
