Óndirip alynǵan múliktiń bank balansynda bolýynyń shekti merzim belgilendi
«Zań jobasy óndirip alynǵan múliktiń bankterdiń jáne mıkroqarjy uıymdarynyń balanstarynda bolýy úshin shekti merzimdi 3 jyl dep belgileýdi kózdeıdi. Bul bankterdi jáne mıkroqarjy uıymdaryn strestik aktıvterdi ekonomıkalyq aınalymǵa jedel túrde tartýǵa yntalandyrady», - dedi Mádına Ábilqasymova.
Budan bólek, zań jobasynda jeke ınvestorlardyń satyp alynatyn qaryzdardy servıstik kompanııalarǵa senimgerlik basqarýǵa berý mindeti kózdeledi.
«Senimgerlik basqarýǵa berý boıynsha talap mynadaı problemaly kredıtterge qoldanylady. Birinshiden, dara kásipkerlerdiń qaryzdaryna alý kezinde. Ekinshiden, zańdy tulǵalardyń bereshegi 16,5 myń aılyq eseptik kórsetkishten nemese 50 mln teńgeden aspaıtyn qaryzdarǵa. Úshinshiden, ınvestor beırezıdent bolyp sanalsa. Qaryz alýshylardyń quqyqtary men múddelerin qorǵaý maqsatynda Qazaqstan Respýblıkasynyń zańnamasynda bank qaryzy jáne mıkrokredıt sharttary aıasynda kredıtordyń qaryz alýshymen ózara qarym-qatynastaryna qoıylatyn barlyq talaptar men shekteýler jeke ınvestorǵa qoldanylatyn bolady. Osylaısha, qaryz alýshylardyń quqyqtary jeke ınvestorlar men servıstik kompanııalar aldynda qorǵalady», - dedi agenttik basshysy.
Atap aıtqanda, bul qujat aıasynda bankterdiń jáne mıkroqarjy uıymdarynyń strestik aktıvterin jeke ınvestorlarǵa satý quqyǵy beriledi.
Zań jobasynda servıstik kompanııalar ınstıtýtyn qurý kózdeledi. Olar ınvestorlarǵa problemaly kredıtterge qyzmet kórsetý jáne basqarý qyzmetterin iske asyrady. Servıstik kompanııalar ınstıtýtyn damytý - strestik aktıvterdiń ótimdi naryǵyn qurý úshin qajetti jaǵdaı jasaıdy.
Budan buryn habarlanǵandaı, 2016 jyldan bastap bank sektoryn qalypqa keltirý boıynsha qabyldanǵan sharalar nátıjesinde 6,7 trln teńge somasyndaǵy strestik aktıvter esepten shyǵaryldy. 2022 jylǵy 1 qańtardaǵy jaǵdaı boıynsha strestik aktıvter mólsheri 2,3 trln teńgeni nemese bank júıesi aktıvteriniń 6 paıyzyn qurady.
