Óńdeýshi sektordaǵy ósim byltyr 1,6 paıyzdy qurady - QR Premer-Mınıstri
ASTANA. QazAqparat - Óńdeýshi sektordaǵy ósim byltyr 1,6 paıyzdy qurady. Búgin QR Prezıdenti N. Nazarbaevtyń qatysýymen ótip jatqan Úkimettiń keńeıtilgen otyrysynda baıandama jasaǵan QR Premer-Mınıstri Serik Ahmetov osylaı málimdedi.
«Byltyrǵy jyly elimizde negizgi kapıtalǵa salynǵan ınvestıtsııa 6,5 paıyzǵa artty. Al eldegi ekonomıkalyq turaqtylyq pen ornyqty ósim bizdiń áleýmettik jańǵyrtý baǵytyndaǵy qarqyndy ustap turýymyzǵa múmkindik beredi. Al Úkimettń aǵymdaǵy jylǵy basty basymdyǵy uzaqmerzimdi mindetterdi tıimdi sheshýge jaǵdaı jasap, álemniń ozyq otyz eliniń qataryna kirý tapsyrmalaryn júzege asyrý», - dedi Premer-Mınıstr.
Úkimet basshysynyń aıtýynsha, uzaqmerzimdi ekonomıkalyq damýdyń negizi - óńdeýshi sektordy damyta otyryp, ındýstrııalandyrý saıasatyn jalǵastyrý. «Biz óńdeýshi sektorda oń dınamıkaǵa qol jetkizdik. Bul byltyrǵy jyly 1,6 paıyzǵa artty», - dedi S. Ahmetov.
